Uvulaire nasaal

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

d'n Uvulaire nasaal of uvulaire naasklank is 'ne mitklinker dae in väöl spraoke veurkump. Hae net get deper inne kael es de velaire nasaal. 't Symboeal det bie 't Internationaal Fonetisch Alfabet gebroek wuuertj is [ɴ].

Kènmirke

De kènmirke vannen uvulaire nasaal zeen:

• De meneer van oetspraok is occlusief, det mèntj det t'r wuuertj gemaak doordet de lóchstroum in 't spraokkenaal wuuertj toegepaotj. Ómdet deze mitklinker ouch nasaal is, wuuertj de geblokkeerdje lóchstroum ómgelèdj dore naas en is t'r 'ne nasaal;
• De oetspraokplaats is uvulair, det inhèltj det t'r wuuertj oetgespraoke mitte baktóng taenge de huug;
• De artikulaasje is gewuuenlik stumhöbbendj, waat mèntj det de stumbenj trille bieje oetspraok;
• Hae is 'ne nasale mitklinker, waat mèntj det de lóch eweg kan kómme dore naas, zowaal ech allein dore naas (nasaal oetsjeijing) of dore naas en ouch de móndj;
• Ómdet dees klank neet wuuertj gemaak door lóchstroum euvere tóng, geldj de dichotomie van centraal taenge lateraal mitklinkers neet;
• 't Lóchstroummechanisme is pulmonisch, det mèntj det de klank wuuertj gemaak door lóch die allein dore lónge en 't middereef wuuertj geduujdj, wie bieje meiste klenk.

Limbörgs

In 't Limbörgs kump d'n uvulaire nasaal allein sómtieds veur es allofoon veuren alveolaire nasaal enne velaire nasaal in 'n r-gekluuerdje ómgaeving, óngere veurwaerd det 't 'ne kael-r is. In 'n stumloeas ómgaeving kan d'r zelf ouch stumloeas waeren oetgespraoken es [ɴ̊], al is dit zeldjzaam. E veurbild van allofoon gebroek vannen uvulaire nasaal is 't kórt zetske hae kan renne ['ɦɛ́:kɐɴ'ʁ̞ænə].

Juus wie bie de anger nasalen in 't Limbörgs wuuertj döks 'ne (zaachte) plosief oetgespraoke wen de nasaal wuuertj opgevolg door 'ne sibilant of fricatief.