Uvulairen tril

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

d'n Uvulairen tril is 'ne mitklinker dae in inkele gespraoke tale veurkump. 't Symboeal det bie 't Internationaal Fonetisch Alfabet gebroek wuuertj is [ʀ].

Kènmirke

Kènmirke vannen uvulairen tril zeen:

• De meneer van oetspraok is tril, det inhèltj det t'r wuuertj vervaerdig dore lóch euveren articulator te sjikke wodoor dae geit trille;
• De oetspraokplaats is uvulair, det inhèltj det t'r wuuertj oetgespraoke mitte baktóng taenge de huug;
• De artikulaasje is stumhöbbendj, waat mèntj det de stumbenj trille bieje oetspraok;
• Ze is 'nen orale mitklinker, waat mèntj det de lóch allein dore móndj eweg kan kómme;
• Ómdet dees klank neet wuuertj gemaak door lóchstroum euvere tóng, geldj de dichotomie van centraal taenge lateraal mitklinkers neet;
• 't Lóchstroummechanisme is pulmonisch, det mèntj det de klank wuuertj gemaak door lóch die allein dore lónge en 't middereef wuuertj geduujdj, wie bieje meiste klenk.

Limbörgs

In 't Limbörgs is dit 'n meugelike oetspraok veure <r>; den wusseltj t'r döks aaf mitte stumloeazen uvulaire fricatief wen d'r in 'ne stumloeaze kónteks steit. Döks wuuertj t'r ouch aafgewusseldj mitte stumhöbbendjen uvulaire fricatief of d'n uvulairen approximant. Biejen aafwusjeling mitten approximant kump 't meistes veur inne verdeiling det d'n tril inne beginposiesje vanne littergreep steit, dewiel d'n uvulairen approximant meistes intervocalisch of bie 'n ènjcluster veurkump.

In 't Mestreechs en 't Wieërts wuuertj d'n uvulairen tril neet-sonorant oetgespraoke, es 'ne fricatief-tril. 't Symboeal det me den gebroek in 't Internationaal Fonetisch Alfabet is [ʀ̝].

Anger meugelike oetspraoke veure <r> zeen:

• [ɾ]: d'n alveolairen tik
• [r]: d'n alveolairen tril
• [ɹ̝]: de stumhöbbendjen alveolaire fricatief
• [ʁ]: d'n stumhöbbendjen uvulaire fricatief
• [ʁ̞]: d'n uvulairen approximant

Zuuch ouch

• Stumhöbbendjen uvulaire fricatief
• Uvulairen approximant