Valkeberg aan de Geul

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Gemeinte Valkeberg aan de Geul (Valkenburg aan de Geul)
Provincie	Limburg
Hoofplaats	Valkeberg
Börgemeister (lies)	Martin Eurlings (CDA)
Opperflaakde – daovan water	36,91 km² 0,20 km²
Inwoeners – deechde:	17.027 (1-4-2011) 464/km²

Valkeberg aan de Geul (Nederlands: Valkenburg aan de Geul) ies saer 1 januari 1982 de naam van 'n gemeinte in zudelik Limburg liegkend tösje (mit de klok mit) de gemeintes Meersje, Voelender, Eisde-Mergraote en Mesjtreech gesitueerd aan de Geul. De gemeinte Valkeberg aan de Geul tèlt per 1 januari 2004 17.768 inweunersj, diet aantal nump aaf door vergriezing. De börgemeister ies, saer 29 februari 2008, Martin Eurlings. Väöl toeriste kómme in Valkeberg um 'n vakantie te viere. Me kalt in de ganse gemeinte Valkebergs, mèt klein oetsjpraokversjille in de biebehuèrende dörper en gehuchte.

De gemeinte haet drie sjtasies aan 't sjpoor van Mestreech nao Heerle: Houtem-St. Gerlach, Valkeberg en Sjin op Geul. 't Sjtedsje Valkeberg, meh eigelik loog 't doen op Hölsbergse grónd, haet de oudste sjtasie van Nederland, geboewd van mergelsjtein in 1853 in neo-sjtiel, bie de aanlèk van 't sjpoor van Mestreech nao Aoke.

Historie

In de historie en tiedens de periode van 't Hertogdom Limburg, waor Valkeberg (mèt zien börch-kesjtièl) 'n hièrlikheid, mèt ónder ziech 38 dörper ouch bekènd es de graafsjap Valkeberg.
Tot 1940 besjtóng 't es 'n (klein) gemeinte Valkeberg mèt allein 't sjtadsgebied. Van 1940 tot 1982 waor 't de gemeinte Valkeberg-Houtem, toen oetgebreid mèt Houtem, Sjin op Geul, gedeilte van Hölsberg (sjtasie, nujeweeg, Reinaldsjtraot), gedeilte van D'n Emmaberg en Vilt en 'n gedeilte van Berg en Terbliet. In 1982 kaome dao nog de de res van de gemeinte Berg en Terbliet bie, 'n gedeilte van Wielder o.a. Sjuèmer, 'n gedeilte van Hölsberg en 'n gedeilte van Klumme.

Dörper en gehuchte

De sjtasie van Valkeberg oet 1853

Saer de herindeiling van de gemeintes in 1982 besjteit de gemeinte oet de volgende dörper en gehuchte, buurtsjappe en wieke:

Berg Geulem (Geulhem) Houtem (Houthem) Sint Gerlach Sjtraobaek (Strabeek) Vroenhof Oud-Valkeberg (Oud-Valkenburg) Sjin (op Geul) (Schin op Geul) Sjtröch (Strucht) Kuiteberg (Keutenberg) Ingwege (Engwegen) Sjuèmer (Schoonbron) Sub (Sibbe) Iezere (IJzeren) Hièrewaeg (Heerstraat)

Terbliet (Terblijt) Valkeberg (plaats) (Valkenburg) Boete de Paort De Hièkerbeek (De Hekerbeek) De Nerem (Neerhem) Oas (Oost) De Plenkert Sint-Pièter (Sint-Pieter, veurmalige kern) Brokem (Broekhem) De Sjtoepert (Stoepert) Heihaof, 'ne carrévörmige haof, liek nog sjuus in de gemeinte op de grens mèt Hölsberg (Nut) Vild (Vilt) Walem (Walem) D'n Emmaberg (Emmaberg) De Hièk (Heek)

Fietsrenne in Valkeberg

• In 1938, 1948, 1979 en 1998 vónge de Waereldkampioensjappe fietsrenne plaats op de Cauberg.
• In 1992 en in 2006 waor de Cauberg aankómsplaats van 'n etappe van Tour de France.
• De Europese kampioensjappe woorte hie in juli 2006 georganiseerd.
• De finishplaats van de Amstel Gold Race, 'ne jaorliks truukkómmende fietsrenklassieker, dae gebruuk maak van de sjtiel hellinge in de gemeinte, waor hie in 2003, 2004 , 2005 en 2006. 't Hellingspercentage van de Cauberg bedreug 12%. Neve de Cauberg zint: de Geulhemmerberg mèt 11%; de Barakkeberg mèt 14 % en de Keuteberg mèt 22% beruchde beklumminge.

50° 52' NB, 5° 50' OL