De Hièkerbeek

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Detail van de kaart van Jacob van Deventer oet 1550 mèt ónderaan Sint-Pièter en loupend nao 't noorde: de Hièkerbeekweeg riechting De Hièk

De Hièkerbeek (Nederlands: De Hekerbeek) ies 'n buurtsjap in Valkeberg in de gemeinte Valkeberg aan de Geul in Nederlands Limburg. Ze ies gelege ten noorde van de krusing Sint-Pièter en achter 't sjpoorviaduc in 't dal van en op 'n helling aan de gelieknamige beek.

Gesjiedenis

Op de landkaart, geteikend door Jacob van Deventer in 1550 sjteit de Hièkerbeekweeg geteikend es 'ne belangrieke verbingingsweeg riechting Klumme en Heerle. Dao liegke nog gein hoezer langs, allein op de driesjprunk in De Hièk bevinge ziech 'n paar hoezer.
De Hièkerbeekweeg, de Hièkerbeeksjtraot, de Herkenbrokerweeg en de Goudsberg zint de oudste sjtraote. In 1952 kómme dao de St. Jozefsjtraot en de St. Nicolaassjtraot bie. De Goudsberg löp riechting 't gehuch Walem en hèt dao Sjteinsjtraot.

Woonbuurt

In de jaore 90 van de 20ste ièw weurt 'n woonwiek geboewd op 't veurmalig land van Kenge van Sint-Pièter. De volgende sjtraote óntsjtoon dan: de Barbarasjtraot, de Sillebeeksjtraot en de Greungrachsjtraot. Sillebeek ies de naam van 't lètste sjtökske (verborge) Hièkerbeek, dat in Valkeberg in de rivier de Geul oetmondt.

De buurtvereiniging Hièkerbeek ies opgeriech in de jaore 50 van de 20ste ièw.