De Sjtoepert

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


De Sjtoepert (Nederlands: Stoepert) ies 'n buurt ten noorde van Brokem in de gemeinte Valkeberg in Zuud Limburg. 't Ies gelege tege de Ravesbösj. De Kattebaek, zoa woort de buurt vreuger ouch waal geneump, sjtruimp door diet gebeed en zal nao 'n paar kilomaeter in Valkeberg in de Geul oetmónde. Nóg 'ne, historische, naam ies Krejjedörp, vanwege de euvergegebleve krejje (euvergebleve sjtökker sjtein, briek, sintel) van de boew van 't Ignatiuscollege. Op 'n landkaart oet de jaore twintig van de 20e ièw sjteit "kraaiendorp" wat 'n verkièrde (Nederlandse) vertaling ies van krejje.

De naam Sjtoepert kump van sjtoep, dat 'hoagerop' beteikent. Aan de kloasterwaeg, vlak veurdat de Sjtoepertwaeg de bösj in klump riechting Arensgenhout, liek 't Ignatiuscollege, 'n kloaster en weitesjapsinstituut van de Jezuïete, geboewd in 1894 door architect Huub Habets. 't Geboew ies opgetrokke van baksjtein en haet neogotische elemente. Tege-n 't kloaster aan liek noe, op de plaats van de ouw neogotische kapel, 'ne nujerwètse oetboew. In 1964 trèkke de zuustersj Franciscanesse in 't complex, naodat hun eige kluèsterke op Sint-Pièter aafgebroke ies. Tot 1982 zal 't kloaster mèt de naam St. Josef, fungere es bejaardehoes Boslös ónder leiding van de nónne. In de tuin weurt vervolges 'n nuuj ónderkómme geboewd veur de religieuze. De oudboew ies daonao jaorelank 'n meditatiecentrum van de Marahishi.

In de jaore 60 van de 20e ièw óntsjteit 'n ganse nuuj woonwiek, de zoageneumde Blomebuurt. Ouch bevingk ziech hie de miedelbaar sjoal van Valkeberg, de Ravesberg, noe Stella Mariscollege geneump. 't Bedrieveterrein De Valkenberg en de begraafplaats van Brokem bevinge ziech hie in de buurt.

In de Ravesbösj liek 't gelieknamig kloaster Ravesbösj van de patersj Heilige Harte. De kloasterkapel ies gewiejd aan Maria van Vrae. 't Medium Jomanda haet hie inkel jaore praktijk oetgeveurd. In deze bösj liegke twiè vieversj en dao zint reste gevónge van Romeinse tied weuninge.

 
Gemeinte Valkeberg aan de Geul
Vaan van Valkenburg aan de Geul
Dörper: Berg · Brokem · Houtem · Oud-Valkeberg · Sjin op Geul · Sub · Valkeberg · Vild
Buurtsjappe en gehuchte: Boete de Paort · D'n Emmaberg · Geulem · De Hièk · De Hièkerbeek · Haersjtraot · Iezere · Ingwege · Keuteberg · De Nerem · Oas · De Plenkert · Sint Gerlach · Sint-Pièter · Sjuèmer · De Sjtoepert · Sjtraobaek · Sjtröch · Terbliet · Vroenhof · Walem
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=De_Sjtoepert&oldid=285745"