Iezere

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Kruuspunt in Iezere (2005)

Iezere (Nederlands: IJzeren) ies e gehuch bie Suub in de gemeinte Valkeberg in Nederlands-Limburg. 't Gehuch liek op 't Plateau va Mergraote, ten zuud-oaste va Suub aan de weeg nao Sjuèlder. Iezere huèrde vreuger gedeiltelik tot de gemeinte Oud-Valkeberg en gedeiltelik tot de gemeinte Wielder. De naam Iezere zou meugelik aafgeleid zin van iezer, dat ziech hie in de grónd zou bevinge, mè daoveur zin gein concrete aanwiezinge.

In de buurt van Iezere vong op 4 juli 1327 'ne veldsjlaag plaatsj tusje d'n hièr va Valkeberg en de Mestreechtenère, de Sjlaag bie Iezere. D'n hièr va Valkeberg, Reinald, woort gestjeund door troepe oet Luuk, Loan, Gulich en Gelder, mè de Mestreechtenère woorte gestjeund door 't völ machtigere Brabant. Die lètste wonne dan auch. Die euverwinning woort in de Sintervaoskèrk in Mestreech noch ièwelaank op de 4e juli gevierd es de Triumphus Traiectensis.

In d'n oondergroond van Iezere weurt mergel gewonne mè d'n ingank van de Suuberberg liek in Suub.

In Iezere sjtoon 'n aantal mergel- en vakwerkboerderieje. Aan de Greunsjtraot bevinge ziech 2 ouw pöthuuskes mèt zaaldaak. Ein mergele carréboerderie haet 'ne klokgevel. Op 'ne driesjprunk van de Kapelsjraot en de Limietsjtraot sjteit 'n mergele waterpöt en 'n kapel die gewiejd ies aan Maria va Lourdes. Dees kapel ies geboewd in 1955. Op väöl krusinge sjtoon en hange kruzer mèt crucifixe.

Same mèt de vlakbie gelege buurtsjap Haersjtraot wone d'r in 2002 330 luuj.