Baekdale

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Sjènnes, es te dit dialek sjpriks.

Gemeinte Baekdale (Beekdaelen)

Hoofplaats

Eric Geurts (PvdA)

Opperflaakde
– daovan water

78,49 km²
0,19 km²

Inwoeners
– deechde:

35.916 (1 augustus 2020)
459/km²

Baekdale (officieel Nederlands: Beekdaelen) is 'n fusiegemeinte in Nederlands Limbörg die op 1 jannewari 2019 is ontsjtange oet de auw gemeintes Ongerbanke, Nut en Sjènne. De gemeinte ligk in 't noorde van 't Heuvelland en haet 'n euverwegend lanjelèk karakter.

Vörming

In 1982 woort Zuid-Limbörg heringedeild. 't Aontal gemeintes zakde daobij in de ganse provincie vaan 103 nao 68, dewijl in de res vaan de provincie gaaroet gein herindeilinge plaotsvoonte. Heibij kaom oonder mie de gemeinte Óngerbenk tot stand, dewijl Nut en Sjènne hendeg woorte oetgebreid. Wie toen nog gebrukelek woorte dees fusies door 't Riek opgelag.

Dit waor de ierste twinteg jaor genóg. De regering bleef de gemeinte evels ummer mie take geve die vreuger door 't Riek of de provincie woorte gedoon. Nao 2000 begós me wel in te zien tot nui herindeilinge op de langen door neet te veurkoume waore. Noe wouw me dat evels neet vaan bovenaof regele, meh de gemeintes zoeväöl meugelek op eige initiatief doen fusere. In de jaore tien kaom dat perces in 'n struimversnelling. In december 2015 beslote Sjènne en de Óngerbenk veur fusiegesprekke te beginne. Later sloot Nut ziech daobij aon. Op 1 november 2016 prizzenteerde de drei gemeintes e herindeilingsoontwerp, compleet mèt geplande fusiedatum. Dit plan woort drei maond t'r inzage gelag en góng in fibberwarie 2017 nao de provincie.

Noe tot 't plan concreet woort, mós me 'ne naom veur de fusiegemeinte bedinke. Börgers mochte 'ne naom suggerere. Oet 178 suggesties, boevaan 79 'geldege', koos me 'rs drei: Beekdaelen, Beemdenrade en Bekenrade. Dao mochte alle börger vaan twelf jaor of awwer euver stumme. Oetindelek koos zoeget dreikwart veur Beekdaelen.^[1]

Op 28 miert 2017 woort 't herindeilingsplan officieel door de drei gemeinteraode aongenome. In de loup vaan 't jaor stumde ouch de provincie en 't Riek demèt in.

Herindeilingshistorie

Zuug ouch: Lies vaan geweze gemeintes in Nederlands Limbörg

Baekdale (sinds 2019)
- Nut (tot 2019)
  - Hölsberg (tot 1982)
  - Sjömmert (tot 1982)
  - Vaosje (tot 1821)
  - Wienesrao (tot 1982)
- Óngerbenk (1982-2019)
  - Bèngelder (tot 1982)
  - Jaobik (tot 1982)
  - Merkelbek (tot 1982)
  - Sjilvend (tot 1982)
- Sjènne (tot 2019)
  - Awstrao (tot 1982)
  - Oeësjbik (tot 1982)

Kerne

De gemeinte umvat 15 dörpskerne:

Awstrao (Amstenrade)
Bèngelder (Bingelrade)
Doonder (Doenrade)
Hölsberg (Hulsberg)
Jaobik (Jabeek)
Merkelbek (Merkelbeek)
Nut (Nuth)
Oeësjbik (Oirsbeek)

Pöt (Puth)
Sjènne (Schinnen)
Sjilvend (Schinveld)
Sjömmert (Schimmert)
Vaosje (Vaesrade)
Wienesrao (Wijnandsrade)
Zjweikese (Sweikhuizen)

Politiek

De börgemeister weurt ind december bekindgemaak en daan op z'ch vreugs op 1 jannewarie es woernummende börgemeister beneump door de provinciegouverneur. In principe weurt heer of zij daan in de loup vaan 't jaor door de Keuning vas beneump.