Réunion

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De ligking van Réunion naeve Madagaskar.

Euverzichskaart van Réunion.

De netuur op Réunion.

Réunion (Frans: La Réunion) is 'n eilandj in Afrika t'n oeaste van Madagaskar en t'n wèste van Mauritius. 't Is e Frans euverzieëdepartement. 'n Aaj benaming die in 1848 woort aafgesjaf woor Île Bourbon.

Réunion woort in 1513 dore Portugezen óntdèk en waas doe nag ónbewóndj. De hujige gemingdje bevölking is vanaaf de zeuvetieëndjen ieëf óntstange wie 't eilandj door Franse, Afrikane, Chineze, Maleisiërs en Indiërs woort bevolk. Toete äöpening van 't Suezkanaal waas 't 'n wichtige halte oppe waeg nao Oeas-Indië. Allewiel us 't eilandj e modern en waalvarendj eilandj mit 'n inwoeanersaantaal op 829.903 (2010). Dees waalvaort dank Réunion veural aan 't toerisme, aangezeen 't 'n geleefdje locatie is ónger bergbeklummers en netuurleefhöbbers. Groeate trèkpleisters zeen de völkaan Piton de la Fournaise en 't strandj van Boucan-Canot.

Ómdet Réunion e Frans departement is maak 't deil oet vanne Europese Unie. Door zien ligking waas 't de ieëste plaats oppe welt wo op 1 jannewarie 2002 de euro woort ingeveurdj; det waas ein of twieë oer ieëder es Europa zelf.

't Guuef twieë lóchhaves op Réunion: Réunion Roland Garros, bie Saint-Denis ane naordziej, de wichtigste, en Saint-Pierre Pierrefonds, 'n kleinder ane zuudkantj.

Spraoke

Op Réunion waere, op inkel wichtige immigrantespraoke nao, slechs drie spraoke gekaldj. Wiedoet de euverhieërsjendjste spraok is 't Réunions Creools, e creool det van 't Frans is aafgeleidj. Wiejer waeren in minder maote Tamil, Hakka, Kantonees, Standerdmandarien en Frans gekaldj. Ouchal is 't Frans de officieel spraok, oppe immigrantjespraoke nao is 't de klènste spraok van 't eilandj.

Demografie

Historische greuj

1671 sjatting	1696 sjatting	1704 sjatting	1713 sjatting	1717 sjatting	1724 sjatting	1764 sjatting	1777 sjatting	1789 sjatting
90	269	734	1.171	2.000	12.550	25.000	35.100	61.300
1826 sjatting	1830 sjatting	1848 sjatting	1849 sjatting	1860 sjatting	1870 sjatting	1887 census	1897 census	1926 census
87.100	101.300	110.300	120.900	200.000	212.000	163.881	173.192	182.637
1946 census	1954 census	1961 census	1967 census	1974 census	1982 census	1990 census	1999 census	2007 sjatting
241.708	274.370	349.282	416.525	476.675	515.814	597.823	706.300	793.000
Gebaseerdj op census en sjattinge van 't INSEE.

E kwart vanne bevölking is van Europese aafkóms; de Indieërs vörme bao e kwart vanne bevölking, de Chineze vörme mit 'n aantaal van 25.000 luuj zoeaget drie procent vanne bevölking. E deil vanne bevölking is van gemindje Afrikaans-Malagassische aafkóms.

Geografie

Stattestieke

• Hoeagste puntj: Piton des Neiges (3.069 m)
• Köslien: 207 km
• Oppervlakdje: 2.513 km²
  • Landj: 2.502 km²
    • Geïrrigeerdj: 60 km²
  • Water: 8 km²

Caldera's

• Cirque de Cilaos
• Cirque de Mafate
• Cirque de Salazie

Völkane

• Piton de la Fournaise (2.631 m)
• Piton des Neiges (3.069 m)

Bestuurlike indeiling

Réunion is e Frans euverzieëdepartement (nómmer 974). De houfstad is Saint-Denis.

't Departement is óngerverdeildj in veer arrondissementee, 49 kantons en 24 gemèndje.

De veer arrondissemente van Réunion zeen:

• Saint-Benoît
• Saint-Denis
• Saint-Paul
• Saint-Pierre

Gebaoren op Réunion

• Roland Garros (1888-1918), 'ne Franse lóchvaartpioneer en kriegsheldj.
• Raymond Barre (1924-2007), 'ne Fransen econoom en politicus (premier van Frankriek van 1976 toet 1981).
• Michel Houellebecq (1958), 'ne Franse sjriever.
• Jackson Richardson (1969), 'nen handjbalspeler.