Kaja Kallas

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Kallas in 2021

Kaja Kallas (gebore op 18 juni 1977 in Tallinn) is 'n Eslandse polletieka. Ze is sinds 26 jannewarie 2021 de premier vaan de Rippebliek vaan Esland. Ze huurt bij de liberaol polletieke partij Eslandse Hervörmingspartij (Eesti Reformierakond ofwel ER) - die op EU-niveau bij de liberaole vaan Renew Europe hure (boe ouch de Nederlandse VVD en D66, de Belzje MR en Open VLD en de Duitse FDP bij hure). Vaan 2014 bis 2018 waor Kallas lid vaan 't Europees Parlemint.

Kaja Kallas is de dochter vaan de veurmaolegen Eslandse premier en Eurokemissaris (bij de Europees Kemissie) Siim Kallas. Ze studeerde aof vaan de middelbaar sjaol in 1995 in de Eslandse hoofstad Tallinn. Vaan 1995 bis 1999 studeerde zie 't Rech aon de Universiteit vaan Tartu. In 1999 woort zie touwgelaote tot de Eslandse Orde vaan Avvekaote. Daoneve is zie sinds 2003 lid vaan de Raoje vaan Bestuur en de Raoje vaan Touwziech vaan versjèllende Eslandse bedrieve die ziech bezeghawwe mèt hernuijbaar energiebrónne.

Polletiek[bewirk | brón bewèrke]

In 2010 trooj Kallas touw tot de liberaol Eslandse Hervörmingspartij (Eesti Reformierakond ofwel ER), die in prinsiep is geriech op gooj geopolletiek ben mèt de Europese Unie (EU) en de NAVO. Häören opriechter is Kallas häöre pap, Siim Kallas - dee ouch veurzitter waor vaan de ER vaan 1994 bis 2004. Bij de Eslandse parlemintsverkezinge in miert 2011 wis zie metein 'ne zedel in 't Eslands parlemint - de Riigikogu - te verovere. Bij de Verkezinge veur 't Europees Parlemint vaan 2014 woort Kallas in Straotsbörg gekoze es eine vaan de zès Eslandse parlemintsleie.

In 2018 woort zie verkoze tot partijleier vaan de ER. In dees konteks verleet zie in vreug september 2018 't Europees Parlemint en naom Igor Gräzin 't vaan häör euver. In miert 2019 wonne zie en häör partij de parlemintsverkezinge, mer 't lökde neet 'n regering te vörme. In plaots daovaan woort Jüri Ratas obbenuits premier. Tot de verassing vaan väöl lui góng zien partij, de Eslandse Centrumpartij (Eesti Keskerakond, EK; ouch deil vaan 't liberaol Renew Europe), 'n coalitie aon mèt Eslandse Conservatieve Volkspartij (Eesti Konservatiivne Rahvaerakond, EKRE) - 'n wiedrechs-nationalistische en populistische partij.

Op 13 jannewarie 2021 deende Ratas evels zien oontslaag in nao 'n corruptiesjandaol. Kallas moch daonao beginne mèt de vörming vaan de nui regiering. 'n Coalitie kaom tot stand mèt de ieder geneumde EK, noe zoonder Jüri Ratas es veurzitter. Heimèt woort Kallas op 26 jannewarie 2021 d'n ierste vrouweleke premier vaan de Rippebliek vaan Esland. Häör kabbenèt besteit oet zeve ministers vaan de ER en EK.

Kallas trouwde in 2018 mèt d'n Eslandse investeringsbankeer Arvo Hallik. Ze heet twie zäöns en ein dochter. Eine zoon kump oet häör ierder rillatie mèt d'n Eslandse polletiekus en zakemaan Taavi Veskimägi.


Flag of Europe.svg Polletieke leiers in d'n Europese Raod: regeringshoufde (RH) of sjtaotshoufde (SH) van de lidjstaote van de Europese Unie
Flag of Europe.svg Charles Michel, President vaan d'n Europese Raod (gein sjtömrech)
Flag of Belgium.svg Belsj: De Croo (RH) | Flag of Bulgaria.svg Bulgarieë: Petkov (RH) | Flag of Cyprus.svg Cyprus: Anastasiadis (SH) | Flag of Denmark.svg Daenemarke: Frederiksen (RH) | Flag of Germany.svg Duutsjlandj: Scholz (RH) | Flag of Estonia.svg Eslandj: Kallas (RH) | Flag of Finland.svg Finlandj: Marin (RH) | Flag of France.svg Frankriek: Macron (SH) | Flag of Greece.svg Griekelandj: Mitsotakis (RH) | Flag of Hungary.svg Hongarieë: Orbán (RH) | Flag of Ireland.svg Ierlandj: Martin (RH) | Flag of Italy.svg Italië: Draghi (RH) | Flag of Croatia.svg Kroatië: Plenković (RH) | Flag of Latvia.svg Letlandj: Kariņš (RH) | Flag of Lithuania.svg Litouwe: Nausėda (SH) | Flag of Luxembourg.svg Luxembörg: Bettel (RH) | Flag of Malta.svg Malta: Abela (RH) | Flag of the Netherlands.svg Nederlandj: Rutte (RH) | Flag of Austria.svg Oesteriek: Nehammer (RH) | Flag of Poland.svg Pole: Morawiecki (RH) | Flag of Portugal.svg Portugal: Costa (RH) | Flag of Romania.svg Roemenië: Iohannis (SH) | Flag of Slovakia.svg Sjlowakieë: Heger (RH) | Flag of Slovenia.svg Sjlovenië: Janša (RH) | Flag of Spain.svg Sjpaanje: Sánchez (RH) | Flag of Czechia.svg Tsjechië: Fiala (RH) | Flag of Sweden.svg Zjwaeje: Andersson (RH)
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Kaja_Kallas&oldid=451546"