Charles Michel

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Charles Michel

Charles Yves Jean Ghislaine Michel (Name, 21 december 1975) is 'ne Belzje liberaole politicus vaan Mouvement Réformateur (MR). De partij zit op Europees niveau bij de liberaole Renew Europe (boe ouch de Vlaomse Open Vld, de Duitse FDP en de Nederlandse D66 en VVD bij zitte). Vaan 11 oktober 2014 tot 27 oktober 2019 waor heer premier vaan 't Belsj. Op dit momint is heer de president vaan d'n Europese Raod, eine vaan de drie hoofinstitute vaan de EU.

Charles Michel is de zoon vaan MR-politicus Louis Michel.

Op 2 juli 2019 woort Michel beneump tot veurzitter vaan d'n Europese Raod. Ind oktober vaan dat jaor lag heer daorum zien functie es premier neer. De regering-Michel waor intösse al sinds de verkezinge vaan 26 mei in loupende zake gegaange. Zien vertouweling Sophie Wilmès volgde häöm in aofwachting vaan 'n nui regering op.

Regiering-Michel

Heer stoond bekind es premier dee aon de leiing stoond vaan 'n "oonmeugeleke coalitie": de liberaol partije MR en OVLD, de christendemocratische CD&V en de Vlaoms-nationalistische N-VA. De coalitie woort officieel 'n feit op 7 oktober 2014. Daomèt waor Michel de jongste premier vaan Belsj in de historie. Op 9 december 2018 veel de regiering vaan Michel oetein vaanwege 't feit tot de N-VA 't VN-migratiepak neet wilde steune. De twiede regiering oonder Michel waor 'n minderheidsregiering. Wie de oppositie dreigde 'n motie vaan wantrouwe te organisere contra häöm booj Michel zien oontslaag aon op 18 december 2018. In de veurbereiing vaan zien veurzittersjap vaan d'n Europese Raod naom Michel op 27 oktober 2019 ontslaag es primier. Heer woort opgevolg door partijgenoet Sophie Wilmès, d'n ierste vrouweleke premier vaan Belsj.