Böätenake

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Sjlennichs, es te dit dialek sjpriks.

---

Doorwaadbaar plaats in de Gulp bie Böätenake in de Groate bösj

Böätenake (Nederlands: Beutenaken) ies 'n buurtsjap van Sjlennich in de gemeinte Gulpe-Wittem in 't heuvelland van Zuud Limburg. Ouwer name zint: Bottinachs, Butenacho, Butenachen. De nederzètting ies gelege in 't dal van de Gulp in lintbeboewing aan de waeg Beutenaken tösje Waterop en Sjlenake. 't Zint groatendeils boerehoezer, woa-ónder ouch vakwerk.

't Reveerke de Gulp, dat 'n ziebeek ies van de Geul, sjtruimp achterum de hoezer. Dao achter bevingk ziech de Groate bösj, 'ne sjtiele hellingbösj mèt haol waeg en gröbbe. In 2003 woonde d'r 90 luuj in Böätenake.

Bezeenswaerdig

Boerehoes in vakwerk gevöld mèt baksjtein

• Aan de driejsprunk mèt de waeg nao Hoagkruts. ónder aan de Piemert, sjteit 'n carréboerderie "de Helenahaof" en 'n groate baekapel oet 1880, gewiejd aan Maria.
• Ein paar vakwerkhoezer en häöf.
• 'n Road baksjteine kapelke oet 1929, gewiejd aan 't Heilig Hart, op de driesjprunk tösje de beboewing, woa vreuger 'n waegkruus sjting. Op dees plaats weurt ins in de drie jaor 'n rösaltaor opgeboewd veur es de brónk langstrèk. Hie weurt dan 'n ( gedeiltelike) Heilige Mès opgedrage.
• 'n Forellekwekerie