Keuteberg

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Keuteberg 22% helling en wieds oetziech

Waegkruus op de Keuteberg

Keuteberg of Kuiteberg (Nederlands: Keutenberg) ies 'n buurtsjap van Sjin-op-Geul gemeinte Valkeberg boven op de gelieknamige berg. Um 't buurtsje van 10 häöf en hoezer te bereike moet me 'n helling van 22% euverbrögke. Die begint in 't gehuchske Ingwege. Tot 1981 huèrde Keuteberg bie de gemeinte Wielder. Vlak veur 't begin van 't gehuchske sjteit 'n ouw mergele sjuur mèt 'n sjilddaak in de wei. Ouch liegke d'r 'n paar vakwerkhoezer. In 't centrum van de bewoning sjteit 'n sjmeediezere waegkruus mèt 'n crucifix. Aan de dweersjsjtang hingk ambachgereidsjap: 'n lödder, 'n mets en 'n pietsjtang. In vreuger tieje haolde me, via e sjtiel bergpaad, 't drinkwater in de Grónzelepöt, 'n brón aan de voot van de berg, woavan 't water in de Geul sjtruimp.

Fietsrenne

Bie fietsrenkampioensjappe wie de Amstel Gold Race, Europese en waereldkampioensjappe weurt dèks gebruuk gemaak van de sjtiele Keuteberg. Vanaaf de berg haet me 'n wieds oetziech euver Sjin, Walem, Ranzel, Klumme en Ees.

Groeve

In de helling bevingk ziech de groeve Keuteberg (kalkaove), woa-oet de Romeine al mergelkalk haolde um dao 't land mèt te mèste. De gebrende kalk woort gebruuk es metsel- en plaosterkalk.