Geulem

Dit artikel is gesjreve (of begós) in 't Houtems. Laes hie wie v'r mit de versjillende saorte Limburgs ómgaon.

---

Grotweuninge

De Geul in Geulem vlak bie de watermeule

Geulem (Nederlands: Geulhem) is e gehuch in de gemeinte Valkeberg aan de Geul. 't Lik aan de rivier de Geul; de naam beteikent dan ouch: "heim aan de Geul". Geulem lik gedeiltelik in 't dal en gedeiltelik aan de Geulemerberg en de Brakkeberg. Bis 1982 huèrde Geulem bie de gemeinte Berg en Terbliet, die doe opgegange is in de gemeinte Valkeberg. Geulem is e toeristeplaetske, veur e klein gehuch ligke d'r relatief väöl hotels.

Geulemergroeve

De Geulemergroeve is e gangesjtèlsel in de berg, woa vreuger mergel woort gewonne. Bie d'n ingank van de groeve haet me e mergele beeld van 'ne blokbreker neergezat. In de grot is ouch 'n kapel gemaak.

Bezeenswaerdighede

Aan en in de Geulemerberg in Geulem lik ein aantal grotweuninge. Die zint bis 't begin van de 20e ièw in gebruuk gewaes es weuning veur de blokbraekersj en woorte in de jaore 70 van de 20e ièw gerestaureerd.

De Geulemermeule dateert van veur 't jaor 1306, want op 27 oktober van dat jaor weurt ze geneump in ein akte es bezitting van 'ne zekere Goswijn van Berg. De watermeule haet ein raad mèt bove-aandrieving aan eine meuletak van de Geul. 't Tegewoordige geboew, oet 1768, is in gebruuk es hotel-restaurant-terras.

Kesjtièl Geulzich is e kesjtièlke oet 't ing van de 19e ièw, óntworpe door d'n architek Henri Reek oet Mestreech. 't Is geboewd van mergel in neogotische sjtiel en bevingk zich aan de Brakkeberg. Saer 1937 is hie e hotel gevestig.

Extern links

• Gesjiedenis van Geulem door Jan Notten, op de site van de Heemkundevereiniging Houthem-Sint Gerlach