Terbliet

Dit artikel is gesjreve (of begós) in 't Berg en Terbliets. Laes hie wie v'r mit de versjillende saorte Limburgs ómgaon.

---

Mergelhaof in Terbliet

Terbliet (Nederlands Terblijt) is 'n gehuch, mèt ongevèèr 200 inwonersj, gelège in 'n dal ten zuide van Berg in de gemeinte Valkeberg a/d Geul. In de 80-jaorige aorlog zeen in Terbliet bienao alle hoezer verenneweerd gewore, mèt 't gevolg dat in 1641 nog mer eine mannelike inwoner euver waor. Tot 1796 waor 't 'n vrie rieksheerlikheid.

Veur de herindeling van de gemeintes in 1982 woort Terbliet altied in eine aom mèt Berg geneump es Berg en Terbliet. In 1981, veurdat Berg en Terbliet bie de gemeinte Valkeberg ingelief woorte, versjeen 'n 500 pagina's tèllend naosjlaagwerk euver de dan veurmalige gemeinte. De auteursj heisje: V.Th.J. Claessens, A.H.H. Houben, H.L. Raeven en geïllustreerd door H.G. (Bèr) Schols.

De luuj van Terbliet huère noe nog altied bie de parochie Monulphus en Gondulphus in Berg en veur ander veurzieninge, zoawie sjoal, winkels, kaffees en vereiniginge zint ze ouch op dees plaats aangeweze. Op diverse sjplitsinge van wèèg sjtaon iezere wèègkruzer en de vings in Terbliet ouch 'n paar groate, gesjlaote (mergele) häöf. Aan de Muntwèèg ligk 'n vakwerkhoes en 'n oud pöthuuske.

'n Paar ouw veldname: Op d'n doaje man, t Pötveldsje en de Kruussjteinwaeg. Dèh lètste wèèg kump van 't Gastes langs 'n Romeinse begraafplaats, de Wyperse Hei, en löp dan euver Berg nao Houtem en wiejer.