Zuud-Korea

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Zuud-Korea
	Blazoen vaan Zuud-Korea
Officieel taol	Koreaans
Hoofstad	Seoul
Staotsvörm	Rippebliek (democratie)
Staotshoof	Roh Moo-Hyun (sins 2002)
premier	Lee Hae-Chan
Groondgebeed % water	99.274 km² 0,3%
Einwoeners	48,4 miljoen
Munt	Won
Tiedzaone	UTC +9
Nationale fiesdaag	15 augustus
Volkshymne	Aegukga
Landcode	KOR
TLD	.kr
Tillefoon	+82

Zuud-Korea, officieel de Rippebliek Korea (Koreaans 대한 민국, Daehan Minguk) is e land in Oos-Azië wat 't zuidelek deil vaan 't sjiereiland Korea besleit. 't land grèns in 't noorde aon Noord-Korea en is wijer aon drei kante door zie umgeve. Hoofstad is Seoul, ander groete stei (mèt d'n officiële status vaan metropool) zien Busan, Daegu, Incheon, Gwangju, Daejeon en Ulsan.

Bestuurleke indeiling

De hoofstad (teukbyeolsi) Seoul en de zes ander metropole (gwangyeoksi, zuug bove bij de inleiing) vörme eige besteurleke einhede, die oonaofhenkelek zien vaan de neuge provincies (do) boe-oet de res vaan 't land besteit. De provincies zien:

• Gyeonggi
• Gangwon
• Noord-Chungcheong
• Zuud-Chungcheung
• Noord-Jeolla
• Zuud-Jeolla
• Noord-Gyeongsang
• Zuud-Gyeongsang
• Jeju

Historie

Korea bestoont tot 't ind vaan d'n Twiede Wereldoorlog es ei land; zuug daoveur Korea.

Nao de Japanse capitulatie verdeilde de Vereinegde State en de USSR 't land in twie stökker; de Sovjetlegers zouwe tot aon de 38e breidegraad marsjere en in 't gebeed ten zuie daovaan zouwe de Amerikane hun bezèttingsmach vestege. In 1948 woorte twie regeringe, 'n communistische en 'n vrijemerretregering, in 't zaodel gezat. In juni 1950 kaom 't tot 'nen oorlog, de Koreaansen Oorlog. Nao aonvenkeleke successe vaan de communiste (die gesteund woorte neet allein door de USSR, meh ouch door de kortbij Volksrippebliek Sjina) kaome de Zuidkoreane trök, aongevuld mèt legers oet Europese len, boeoonder Nederland en 't Belsj. eteindelek woort in 1953 e stop-'t-veure aofgeslote, wat de facto 't ind vaan d'n oorlog beteikende, al is de vrei tösse de bei len noets geteikend.

In de jaore daonao kaom Zuud-Korea oonder 'n autocratisch beweend, wat iers nog ikkenomisch bij Noord-Korea achterleep, meh vaanaof de late jaore zesteg dit land inhaolde en 'n ikkenomische groetmach ("tieger") woort. Nao 'ne coup in 1980 kaome sociaal oonröste op geng, die oeteindelek leide tot de inveuring vaan de democratie in 't land. De president Kim Dae-Jung, dee vaan 1998 tot 2002 in functie waor, brach mèt de Zonnesjijnpolletiek de doej mèt naoberland Noord-Korea op geng, meh slaogde neet in echte touwnaodering, ouch al umtot ziene Noord-Koreaanse collega Kim Jong Il weineg tot niks touwgaof en -gif. Heer woort bij zien aoftrejje in 2002 opgevolg door de get rechlienegere Roh Moo-Hyun, dee zien zonnesjijnpolletiek neet veurzètde.