Israël

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Staot Israël

Vlag van Israël

Waope van Israël

Lokasie van Israël

Basisgegaevens
Officieel taal Hebreeuws, Arabisch
Hoofsjtad Jeruzalem (betwis)
Sjtaotsvörm Parlementair democratie
Sjtaotshoof (lies) Reuven Rivlin (sinds 2014)
premier Benjamin Netanyahu
[[{{{titelhoofregering1}}}]] {{{naomhoofregering1}}}
[[{{{titelhoofregering2}}}]] {{{naomhoofregering2}}}
[[{{{titelhoofregering3}}}]] {{{naomhoofregering3}}}
Religie {{{religie}}}
Opperflaakde
– % water
20.770-22.072 km²
2,12%
Inwoeners
Deechde:
8.602.000 (2016)
391/km²
Biekómmende gegaeves
Munteinheid Sjeqel (NIS) (ILS)
Tiedzaone UTC +2
Nationale fiesdaag 14 mei
Vouksleed Hatikva (De Hoop),
Web | Code | Tel. .il | ISR | +972

Israel, officieel de Staot Israël (Hebreeuws: מדינת ישראל, Medinat Jisraël; Arabisch: دولة اسرائيل, Dawlat Israïl), is e land in 't Midde-ooste en de einege staot op de wereld mèt 'ne Joedse groondslag. 't Land is in 1948 gestiech op 't groondgebeed vaan de aw Britse kolonie Palestina, boevaan 't oongeveer dreikwaart besleit.

Geografie[bewirk | brón bewèrke]

Israël is gelege op de samekoms vaan Europa, Azië en Afrika. 't Land is gelege aon de oosteleke Middellandse Zie en is zoe groet (of beter gezag klein) es haaf Nederland (binne de Greun Lijn). Oondanks zien beperkde gruutde, heet Israël een zier oeteinloupend klimaat. In 't weste - de Sjaron - bevind ziech e redelek vlaak dal. 't Klimaat in de Sjaron is werm en erg vochtig; zoe wie 'nen benajde zomerdaag. In 't noorde zien mierdere berge (boe-onder de Karmel bij Haifa), boe ouch regelmaoteg snie völt. In 't noordooste lègke de heuvels vaan Galilea, boe ouch de bekinde Zie vaan Galilea lègk. Mie richting 't ooste (in de buurt van Jeruzalem) steig 't landsjap snel en weurt 't dudelek druger. Door die huugde - Jeruzalem lègk op umtrint 'ne kilometer bove de ziespiegel - is 't dao ummer e paar gräödsjes kawwer es in de Sjaron. Nog mie nao 't ooste keldert 't landsjap: de Doei Zie is 't deepste punt op Eerd (~400 meter oonder zieniveau). De zuideleke haaf vaan Israël besteit veur z'n gehiel oet de Negev-weustenij. Dao kin 't extreem werm weure, en regent 't meh ein of twie keer per jaor.

Gesjiedenis[bewirk | brón bewèrke]

Prehistorie[bewirk | brón bewèrke]

Biebelsen tied[bewirk | brón bewèrke]

't Weurt euver 't algemein aongenome tot Israël zoen 3500 jaor geleije iers dudelek vörm heet gekrege oonder lui oet Kanaän. In Aajd-Egyptische tekste keump de naom 'Israël' veur 't iers veur in 1209 veur de jaortèlling. In 1020 veur de jaortèlling woorte de Israëlische dörpkes vereinig oonder ein keuninkriek, mèt Saul es keuning. Dit "Vereinig Keuninkriek vaan Israël" heet bestande tot 930 veur de jaortèlling, en in totaal drei keuninge gehad: Saul, David en Solomon. Nao de doed vaan Solomon heet dit keuninkriek ziech gesplits in twie deile: 't noordeleke Keuninkriek vaan Israël, en 't zuideleke Keuninkriek vaan Judah.

Dees situatie bestoont tot 722 veur de jaortèlling, toen 't neo-assyrische riek Israël bezat en häör hoofstad (toen Samaria) vernetigde. In de zèsde iew veur de jaortèlling woort Judah verovert door Nebuchadnezzar II oet Babylon, boenao d'n tempel vaan Solomon vernetig woort en de bevolking woort verbanne nao Babylon. Vieftig jaor later woort Babylon zelf weer verovert door Perzië, en oonderdaone vaan aander volke woorte relizjieuze vrijheid gegeve, boenao de lui van Judah (de Joede) zien trökgekierd nao Judah. D'n Twiede Tempel vaan Jeruzalem woort gebouwd. Roond dees tied heet 't Joedse geluif, wie v'r tot noe kinne, ziech dudelek oontwikkeld ('t woort 'Joed' kump oeteindelek vaan 'Judah').

Door invlood van de Grieke woort Israël later Hellinistischer, meh kreeg in 160 veur de jaortèlling toch volledig zèlfbestuur oonder de Hasmoonse dynastie. Dit keuninkriek waor Joeds, allewel de bureaucratie vaol zaot mèt Grieke. De Hasmoonse dynastie heet 't tot 37 veur de jaortèlling oetgehawwe, toen de Romeine keuning Herod op d'n troen zatte. Neet väöl later moot Jezus vaan Nazareth gebore zien in Bethlehem.

'n Paar decennia nao de doed vaan Jezus höbbe ziech 'n aontal Joedse opstande tege de Romeine veurgedoon, mèt es einde d'n Opstand vaan Bar Kochbah, vaan 132 tot 136. Tiedes dees opstand voonte volges de Cassius Dio 580.000 Joede d'n doed, en woort d'n Twieden Tempel in Jeruzalem vernetig. Keizer Hadrianus verbooj Joedse zake, boenao de bevolking wijer kroomp en lankzaamaon ewegtrok, mèt de Joedse diaspora es gevolg.

Middeliewe[bewirk | brón bewèrke]

Ottomaansen tied[bewirk | brón bewèrke]

Zionisme en d'n Britsen tied[bewirk | brón bewèrke]

Theodor Herzl, grondlègker vaan 't zionisme

In de negetiende iew waor 't credo vaan 't Joedse establishment in Europa um ziech ummertouw mie te assimelere in de Europese maatsjappij, in de hoop tot dit anti-semetisme zouw vermindere. Tot d'n Oosterieks-Hongaarse journalis Theodor Herzl in 1895 zien book Der Judenstaat publiceerde. In Der Judenstaat betoogde heer tot de Joede beter aof zouwe zien in hun eige land, tot bij veurkäör in 't historische Joedse toesland - Israël - zouw mote koume te ligke. Dit idee vaan zionisme bleek aon te sloon bij väöl Europese Joede, en woort versterk door de herleving vaan 't Hebreeuws es daogelekse taol door Eliezer Ben-Jehudah. 't Joeds Nationaal Fonds en aandere organisaties woorte opgeriech um Joedse immigratie nao Palestina te oondersteune. In 1922 waore 'rs 83.000 Joede in Palestina; in 1946 waore tot 'rs al 608.000.

Nao 't einde vaan d'n Ierste Wereldoorlog veel 't Ottomaans Riek oeterein, en naome de Britte de mach euver in e groet gedeilte vaan 't Midde-Ooste, boe-onder 't allewiel Israël, noe umgedäöp tot 't Britse Mandaat in Palestina. Al in 1917 stèlde de Britte veur um 'n Joedse staat op te riechte in 't Mandaat, mèt de Verklaoring vaan Balfour. Nao etnische relle in 1920 woort de Haganah opgeriech, um de Joede te verdedige tege Arabisch en Brits geweld. Nao de oonaofhenkelekheid vaan Israël in 1948 transformeerde de Haganah tot 't Israëlische leger. In 1922 woort de Balfourverklaoring in groete maote euvergenome door de Volkerebond, tot de Britte e mandaat gaof um tot 1948 te zörge veur de splitsing vaan Palestina in 'ne Joedse staot, en 'nen Arabische staot. In dees tied gaof 't väöl Joedse immigratie nao 't mandaat, tot in grofweg vief golve - de Aliyah's ("trökkoms") - bestoont. Nao de opkoms vaan 't Nazisme in Europa greujde dees immigratie ummertouw gawwer, wat de spanninge in 't Mandaat op sjerp zat. De Britte perbeerde vaanaof 1939 Joedse immigrante tege te houwe; väöl Joedse immigrante die de holocaust zjus hadde oontvlöch, kaome in Britse detentiekampe terech (oonder aandere op Cyprus).

Nao d'n Twiede Wereldoorlog woorte de Vereinigde Naties opgezat, dat al in 1947 een resolutie aonnaom (33 veur, daartien tege en tien blanco) tot splitsing vaan 't Mandaat in 'ne Joedse staot en 'nen Arabische. De Joede zowwe 'ne smalle kösstrook kriege, en daoneve de noordeleke vlaktes en de Negev-weustenij, en de Arabiere de res vaan 't land. Jeruzalem zouw direk oonder VN-bestuur kaome te valle - neet Joeds, neet Arabisch.'t Partitieplan woort door de mieste Joede good oontvaange, en me waor daan ouch euver 't algemein content. De Arabische inwoeners waore daorentege fel gekant tege 't plan, en neet väöl later braok daan ouch 'nen börgeroorlog oet. De Joede zaote in 't begin vaan dees börgeroorlog in 't defensief, meh sloge later trök mèt succes. De Palestijns-Arabische economie implodeerde en 250.000 Arabiere vluchtte of woorte verdreve. Daotegeneuver vlöchde väöl Joede venoet Arabische en Noord-Afrikaanse len nao Israel.

VN-partitieplan veur 't Brits Mandaat in Palestina. Oranje: gebede gemeind veur de Joedse staot. Geel: gebede gemeint veur de Arabische staot.


Staot Israël[bewirk | brón bewèrke]

Op de veuraovend vaan 't einde vaan 't Brits mandaat, op 14 mei 1948, verklaorde David Ben-Goerion Israël veur oonaofhaankelek. Op dat momint waor d'n börgeroorlog nog in volle gaank. De Haganah, de groetste Joedse paramilitaire groepering, woort umgevörmp tot 't Israëlische leger. D'n aanderen daag verklaorde Egypte, Transjordanië, Syrië, Libanon en Irak de nuien Israëlische staot d'n oorlog. In december vaan datzelfde jaor annexeerde Jordanië (toen nog Transjordanië) de geiede die me allewijl de Westeleke Jordaanover neump. In 't veurjaor vaan 1949 woorte versjillende wapenstilstande geslote mèt de Arabische len, mèt op z'n lès Syrië op 20 juli 1949. De grenze die toen zien aofgesproke (de greun lijn) gelle euver 't algemein noch ummer es internationaal erkinde grenze. 't Westelek deil van Jerusalem kaom in 't Israëlische gebied te lègke.

Nao d'n oorlog kraog Israël te make mèt groetschalige immigratie. Zoe'n 700.000 Joedse vluchtelinge, veurnamelek oet Europe en de Arabische wereld, zowwe Israël bereike in de drei jaore tösse 1948 en 1951. Noch mie zouwe later kaome. De bevolking greujde vaan 800.000 in 1948 naor 2 miljoen in 1958. Dit had ziene weerslaag op de economie. Op vaanalles waor 'n tekort. De socialistische regering vaan Ben-Goerioen had meujte roond te koume, gezeen de mieste immigrante vluchtelinge waore mèt wieneg of gein bezittinge en geld. In september 1952 woort daan aoch 't in Israël zier controversiële Verdraag vaan Luxemburg geslote tösse Israël en Wes-Duitsland, boemèt de Duitsers de Israeli's inkele miljarde Duitse marke zouwe betaole es compensatie veur 'tgeen de Nazi's de Joedse bevolking höbbe aongedoon.

Demografie[bewirk | brón bewèrke]

Israël heet zoen 8,6 miljoen inwoeners, boevaan ongeveer dreikwaart Joeds is. De res is mèt name Arabisch (boevaan weer de meiste moslim zien, mèt 'n kleine christeleke minderheid). De euvergroet mierderheid vaan de christene zien etnisch Arabier. Israël heet al jaore de hoegste bevolkingsgreuj in de OECD.

De Joedse bevolking kint opgedeild weure in de Asjkenazi, die oet Midde- en Oos-Europa koume, en de Sefardi, die oet de len um de Middellandse Zie en Arabische len koume. Wijer kint me de Joedse bevolking opdeile in de seculiere (de groetse gróp), relizjieuze en de orthodoxe Charediem.

Israël is sterk verstedelek, en grofweg de haaf vaan de bevolking woent in de metropool in en roond Tel Aviv (de Goesj Dan). De meiste stei zien etnisch homogeen, mèt plaotse boe mèt naome Joede woene, en plaotse boe mèt naome Arabiere woene. De Arabische bevolking woent mèt name in de oosteleke Sjaron en in 't noorde. Gemengde stei zien Jeruzalem, Haifa, Akko en in mindere maote ouch Tel Aviv.

Daoneve gief 't 'n paar kleinere etnische gróppe, wie de Tsjerkesse en de Armene. De Druze woene mèt naome in 't noorde vaan Israël, en de nomadische Bedouïene zwerve euver de wijer praktisch lege Negev.

Taole[bewirk | brón bewèrke]

In Israel zien 't Hebreeuws, gevolg door 't Arabisch de meis gesproke taole. 't Rössisch is de daarde taol. Aander taole weure door kleine minderhede gekald.

Commons
Op de pazjena Israel van Wikimedia Commons zeen media gerelateerd aan dit óngerwerp te vènje

Referenties[bewirk | brón bewèrke]


Wiki letter w.svg  Dit artikel is e sjtumpke. De kans Wikipedia helpe door 't aan te völle


Lenj in Azië
Afghanistan · Armenië¹ · Azerbeidzjan · Bahrein · Bangladesh · Bhutan · Birma · Brunei · Cambodja · China · Cyprus¹ · Filipiene · Georgië¹ · India · Indonesië · Iran · Irak · Israël · Japan · Jeme · Jordanië · Kazachstan · Kirgizië · Koeweit · Laos · Libanon · Maledive · Maleisië · Mongolië · Nepal · Noord-Korea · Oezbekistan · Oman · Oos-Timor · Pakistan · Papoea-Nuuj-Guinea · Rusland¹ · Qatar · Saoedi-Arabië · Singapore · Sri Lanka · Syrië · Tadzjikistan · Thailand · Turkieë¹ · Turkmenistan · Vereinegde Arabische Emirate · Vietnam · Zuud-Korea
Aafhenkelike gebejer: Akrotiri en Dhekelia¹ · Gazasjtroek · Hong Kong · Macau · Westelike Jordaankantj
Sjtatus betwis: Abchazië¹ · Hoeg-Karabach¹ · Palestiense Sjtaot · Naord-Cyprus¹ · Taiwan · Zuud-Ossetië¹
1. Dit land ligk gedeiltelik of gans in Azië, meh weurt óm cultureel en historische raejes bie Europa ingedeild.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Israël&oldid=412617"