Mario Draghi

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Mario Draghi sprik in 2021 op 'n conferentie vaan de Italiaonse regiering

Mario Draghi OMRI[1] (3 september 1947, Roeme) is 'nen Italiaonsen ikkenemis, baankeer, academicus, ambteneer en polletiekus dee sinds 13 fibberwarie 2021 de premier vaan Italië is en vaan 2011 bis 2019 de prizzedent vaan de Europees Centraol Baank waor.

Nao 'n lang carrière es academisch ikkenemis in Italië góng Draghi in de 1980'er jaore wèrke veur de Wereldbaank te Washington D.C.. In 1991 kierde heer trök nao Roeme um d'n Directoir General te weure vaan 't Dipartimento del Tesoro in 't Italiaons ministerie vaan Financies. In 2001 góng heer wèrke veur de baank Goldman Sachs. In 2006 woort heer de Goevernäör vaan de Baank vaan Italië. Zien carrière aldao zou al gauw ziech gans en al riechte op de kredietcrisis vaan 2008.

Heer leet dees rol achter ziech wie heer in 2011 door d'n Europese Raod woort genomineerd tot Prizzedent vaan de Europees Centraol Baank. Heer góng euver dit instituut in d'n tied vaan de Eurocrisis en heer woort bekènd in gaans Europa veur zien attitude roondum 't redde vaan d'n Euro: "We are prepared to do whatever it takes to prevent the Euro from falling" ("Veer zien veurbereid um al te doen um de val vaan d'n Euro te veurkoume"). Nao zien opmerking goof 't 'n dudelek veraandering in 't ikkenomisch vertrouwe in de Eurozone.

In 2014 woort Draghi door 't tiedsjrif Forbes oetgerope tot d'n 8e mechtegste maan op de wereld. Fortune neumde häöm in 2015 es d'n twiede belaangriekste leier op eerd. Paul Krugman besjreef häöm in 2019 "de groetse baanker in de modernen tied". Zien monetair polletiek heet häöm bij väöl lui bekènd gemaak es "de redder vaan d'n Euro" gedäörende de crisis. Ziene bijnaom in de Europese media woort Super Mario nao 't Japans-Italiaons icon oet de videogames-wereld, Mario (Nintendo).

Nao Draghi's periood es ECB-prizzedent in 2019 besloot heer in ierste instantie ziech eweg te kiere oet 't polletiek domein en wilde heer mie aondach geve aon zien femilie en privéleve. Op 3 fibberwarie 2021 woort Draghi, in 't middel vaan de COVID-19-pandemie, door d'n Italiaonse prizzedent Segio Mattarella um 'n nui regiering te vörme naotot veurmaolege premier Giuseppe Conte ziech tröktrok. Nao succesvol oonderhandelinge mèt partije wie Lega, Vief Stare-beweging, de Democratische Partij (Italië) en Forza Italia woort Draghi ingezwore es premier op 13 fibberwarie 2021 um d'r veur te zörge tot de economische stimuli vaanoet de Europese Unie, es reactie op de pandemie en häör ikkenomische naosleep, efficient woorte geïmplimenteerd.

Draghi kroog ouch de nudeg kritiek es premier. Zoe woort heer door väöl Italiaone gezien es e symptoom vaan de nao-oorlogse Italiaonse traditie vaan technocratie: 't idee tot eder zoeväöl jaor 't nudeg is in Italië um vaan democratie nao technocratisch beweend te kiere, zoonder verkoze politici en mèt nao veure gesjove weitesjappers die gein polletiek legitimiteit höbbe. Vaanoet linkse hook kraog Draghi de kritiek tot heer 't groet-kapitaol zou dene in plaots vaan 't Italiaons volk; zoe waore zien hervörmingsplanne deils nao veure gesjove es deal mèt 't multinational-bedrief McKinsey & Company.

Brón[bewirk | brón bewèrke]

  1. Ordine al merito della Repubblica Italiana, ridder vaan de Rippebliek


Flag of Europe.svg Polletieke leiers in d'n Europese Raod: regeringshoufde (RH) of sjtaotshoufde (SH) van de lidjstaote van de Europese Unie
Flag of Europe.svg Charles Michel, President vaan d'n Europese Raod (gein sjtömrech)
Flag of Belgium.svg Belsj: De Croo (RH) | Flag of Bulgaria.svg Bulgarieë: Janev (RH) | Flag of Cyprus.svg Cyprus: Anastasiadis (SH) | Flag of Denmark.svg Daenemarke: Frederiksen (RH) | Flag of Germany.svg Duutsjlandj: Merkel (RH) | Flag of Estonia.svg Eslandj: Kallas (RH) | Flag of Finland.svg Finlandj: Marin (RH) | Flag of France.svg Frankriek: Macron (SH) | Flag of Greece.svg Griekelandj: Mitsotakis (RH) | Flag of Hungary.svg Hongarieë: Orbán (RH) | Flag of Ireland.svg Ierlandj: Martin (RH) | Flag of Italy.svg Italië: Draghi (RH) | Flag of Croatia.svg Kroatië: Plenković (RH) | Flag of Latvia.svg Letlandj: Kariņš (RH) | Flag of Lithuania.svg Litouwe: Nausėda (SH) | Flag of Luxembourg.svg Luxembörg: Bettel (RH) | Flag of Malta.svg Malta: Abela (RH) | Flag of the Netherlands.svg Nederlandj: Rutte (RH) | Flag of Austria.svg Oesteriek: Schallenberg (RH) | Flag of Poland.svg Pole: Morawiecki (RH) | Flag of Portugal.svg Portugal: Costa (RH) | Flag of Romania.svg Roemenië: Iohannis (SH) | Flag of Slovakia.svg Sjlowakieë: Heger (RH) | Flag of Slovenia.svg Sjlovenië: Janša (RH) | Flag of Spain.svg Sjpaanje: Sánchez (RH) | Flag of Czechia.svg Tsjechië: Babiš (RH) | Flag of Sweden.svg Zjwaeje: Löfven (RH)
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Mario_Draghi&oldid=449733"