Twiede Devisie (Nederlands voetbal)
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Twiede Devisie is 'n Nederlandse voetbalcompetitie. 't Is 't daarde niveau vaan de Nederlandse voetbalpiramide, oonder de Ierste Devisie en bove de Daarde Devisie. D'n opzat is semiprofessioneel; de competitie is (feitelek same mèt de Daarde Devisie) bedoeld es brögk tössen 't profvoetbal en 't amateurvoetbal.
Historie[bewirk | brón bewèrke]
De Twiede Devisie woort oersprunkelek in 1956 ingestèld mèt de umerming vaan 't betaold voetbal door de KNVB. 't Gaof toen twie aofdeilinge, 'n Twiede Devisie A en 'n Twiede Devisie B. In de praktijk waore dit veural semi-professioneel clubs; vaan wat ze hun speulers oetbetaolde kós me neet leve. In 1966 woort dit trökgebrach tot ein inkel aofdeiling (in de sezoene 1960/61 en 1961/62 waor dat ouch al zoe), in 1971 woort de Twiede Devisie gans aofgesjaf. Lèste kampioen waore De Volewijckers.
Um doorstruiming tösse amateur- en profvoetbal weer meugelek te make woort in 2010 de Topklasse opgeriech. De kampioen vaan dit niveau kós es 'r wouw promovere nao de Ierste Devisie, te koste vaan de lieg geklasseerde club dao-oet. In de praktijk wouwe de Topklasseclubs dit gaaroet neet; de eise die de KNVB stèlde aon de accommodatie en de bedriefsveuring laoge wied vaan wat me es amateurclub (zelfs in 't al vrij professioneel topsegmint) gewoen waor. Daorum besloot me per 2016 de Twiede Devisie obbenuits op te riechte. Dao-in kóste diverse Topklasseclubs en belofteteams instruime; vaan de res vaan de Topklasse maakde me de Daarde Devisie.
Kampioene[bewirk | brón bewèrke]
|
| |||||||||||||||||||||||||||||||||||||||||||||||||||||||||||||||||||||
Opzat[bewirk | brón bewèrke]
De Twiede Devisie umvat 18 teams: 14 hoofteams vaan clubs en veer belofteteams vaan groeter clubs. Die speule in 34 speulrundes allemaol twie kier tegenein, eine kier oet, eine kier toes. De kampioen promoveert nao de Ierste Devisie, de nommers 17 en 18 nao de Daarde Devisie. Nommers 15 en 16 mote naocompetitie speule mèt clubs oet de Daarde Devisie um ziech in de Twiede te kinne hawwe. Natuurlek koume veur de gedegradeerde en gepromoveerde clubs teams oet de respectief competities in de plaots.
De belofteteams kinne neet promovere en degradere. Wienie e belofteteam op plaots 1 indeg, kump nommer 2 in aonmerking veur promotie (of nog lieger, wienie nujeg). Kump e belofteteam op 'n degradatieplaots, daan vèlt de degradatie of naocompetitie touw aon 'n hoeger geklasseerde club.
De Twiede Devisie is gooddeils gerecruteerd oet Topklasseteams, dus ouch oet teams vaan de Topklasse zaoterdag. Väöl zaoterdagamateurclubs zien vaan (orthodox-)protestantse signatuur en wèlle liever neet op de zondag voetballe. Um dit probleem (deils) op te losse kinne teams in de Twiede Devisie 'ne väörkäörsdaag aongeve; zoe hove ze in eder geval zoelaank ze neet promovere nog neet op de zondag te speule.
Clubs[bewirk | brón bewèrke]
In 't aonkoumend sezoen (2016/17) speule de volgende clubs in de Twiede Devisie:
| Club | Plaots | Opgeriech | Stadion/Complex | Capac. | Trainer | Prestatie '15/'16 |
|---|---|---|---|---|---|---|
| AFC | Amsterdam | 1895 | Goed Genoeg | 2.000 | Ton du Chatinier | 6e Topklasse Zondag |
| Joonk AZ | Wijdewormer | 1967 | Kalverhoek | 200 | Martin Haar | 3e Belofte-Ieredevisie |
| BVV Barendrecht | Barendrecht | 1926 | De Bongerd | 3.000 | Adrie Poldervaart | 5e Topklasse Zaoterdag |
| Excelsior Maassluis | Maassluis | 1918 | Lavendelstraat | 5.000 | Jeroen Rijsdijk | 1e Topklasse Zaoterdag |
| GVVV | Veenendaal | 1947 | Panhuis | 4.000 | John de Wolf | 7e Topklasse Zaoterdag |
| HHC Hardenberg | Hardenberg | 1954 | De Boshoek | 4.500 | Joseph Oosting | 2e Topklasse Zaoterdag |
| VV Katwijk | Katwijk | 1939 | De Krom | 6.000 | Dick Schreuder | 3e Topklasse Zaoterdag |
| Keuninkleke HFC | Haarlem | 1879 | Spanjaardslaan | 1.500 | Pieter Mulders | 3e Topklasse Zondag |
| SV Kozakken Boys | Werkendam | 1932 | De Zwaaier | 5.000 | Danny Buijs | 4e Topklasse Zaoterdag |
| FC Lienden | Lienden | 1930 | De Abdijhof | 2.400 | Hans Kraaij jr. | 1e Topklasse Zondag |
| SV Spakenburg | Spakenburg | 1931 | De Westmaat | 8.000 | Hans van de Haar | 6e Topklasse Zaoterdag |
| Joonk Sparta | Rotterdam | 1888 | Het Kasteel | 10.599 | Ole Tobiasen | 4e Belofte-Ieredevisie |
| TEC VV | Tiel | 1924 | De Lok | 2.500 | Frits van der Berk | 2e Topklasse Zondag |
| SV De Treffers | Groesbeek | 1919 | Sportpark Zuid | 5.000 | Anton Janssen | 4e Topklasse Zondag |
| Joonk FC Twente | Hengelo | 1965 | FC Twente-Trainingscentrum | 0 | Paul Bosvelt | 5e Belofte-Ieredevisie |
| VV UNA | Veldhoven | 1929 | Sportpark Zeelst | 3.000 | Mark Schenning | 7e Topklasse Zondag |
| Joonk Vitesse | Arnhem | 1892 | NSC Papendal | 550 | John Lammers | 2e Belofte-Ieredevisie |
| VVSB | Noordwijkerhout | 1931 | De Boekhorst | 2.500 | Wilfred van Leeuwen | 5e Topklasse Zondag |
- Opmerkinge
- 't Hoofstadion vaan AZ steit in Alkmaar, meh 't trainingscomplex is in Wijdewormer. Evezoe: FC Twente heet zie stadion in 'n aander plaots (nl. Enschede) es 't complex boe 't belofteteam späölt.
- Sportcomplexe höbbe soms mie plaotse es de wienege die hei zien aongegeve. Zoe heet 't trainingscentrum vaan FC Twente gein tribune, meh wel staonplaotse aon de kant.
Gein vaan dees clubs heet ieder aon de aw Twiede Devisie mètgedoon. Limbörgse clubs kint de competitie neet; EVV oet Ech kaom in 2016 neet wijer es de èlfde plaots in de Topklasse zondag en bleef zoedoende in de Daarde Devisie.