Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Go Ahead Eagles is 'n voetbalclub oet de Nederlandse stad Deventer. De club woort op 2 december1902 opgeriech oonder de naom Be Quick. Bij de touwtrejjing tot d'n NVB in 1905 mós de naom veraanderd weure in Go Ahead umtot 't al 'n Groningse club mèt dee naom gaof. Al gaw waor de ploog succesvol: Go Ahead woort jaor in, jaor oet kampioen vaan 't oostelek distrik, en haolde in 1917, 1922, 1930 en 1933 't landskampioensjap. Nao d'n Twiede Wereldoorlog woort de concurrentie groeter; bij de inveuring vaan 't devisiesysteem in 1956 struimde de club mer in de Twiede Devisie in. Nog zier succesvol woort Go Ahead ind jaore zèsteg. In 1971 woort de club, entans de nui aofgesplitsde proftak, officieel umgeduip tot Go Ahead Eagles. Dit waor 'n idee vaan d'n toenmaolegen trainer Barry Hughes. Sinds ind jaore tachteg späölt de club veural in de Ierste Devisie, mèt noe en daan e sezoen Ieredevisie. Ouch in 't huieg sezoen (2016/17) kump Go Ahead Eagles dao-in oet.
De club steit bekind um zien awwerwètse, soms es 'Ingels' umsjreve clubcultuur. 't Stadion, d'n Adelaarshorst (10.000 plaotse groet), steit in 'n woenwiek (aon de Vetkampstraat) en heet de tribunes nog kort op 't veld. De voetbalcultuur heet ouch zien duuster kante: hooliganisme is de club neet oonbekind. Groete rivaol is PEC Zwolle, boetege Go Ahead Eagles d'n IJsselderby späölt. De lèste jaore besteit ouch vijandsjap mèt De Graafschap. Aon allebei de kante is 't bij derby's al tot geweld tege de speulers gekoume.[1] Sinds 2008 heet de club 'n mascot in Harley. Veur aonvaank vaan edere toesmatch liet me dezen Amerikaanse zie-erend door 't stadion vlege.
