Sjuuëlder

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Wieldersj, es te dit dialek sjpriks.

---

Sjuuëlder

Sjuuëlder (Nederlands: Scheulder) ies ’n gehuch in de gemeinte Èèsjde-Mergraote op ’t plateau in Zuud-Limburg. De naam haet get mèt sjoele (schuilen) te make. In vreuger jaore loog hie aan de heerbaan ’n gashoes tegeneuver de kèrk woa me koes sjoele. De waeg waor in vreuger tieje ‘ne verbingingswaeg en pelgrimsroute tösje Mestreech en Aoke. Onder ander de heilige Lambertus, Wilibrordus en Gerlachus en ouch Karel de Groate maakde dao gebruuk van. De ander gashoezer aan deze waeg liegke op ‘t Gastes en in Gulpe.
De ongevaer 150 häöf en hoezer liegke in lintbeboewing aan weerszie van de waeg tösje Iezere en Ingber. De meiste boerderieje (sómmige oet de 19e ièw) zint geboewd van Suubber mergel en ’n aantal valle ónder ’t Limburgse, gesjlote carrétype.
Aan de noordkant van 't dörpke bevingk ziech ’t natuurgebeed en reservaat de Gieëlender (Gerendal) en aan de zuudkant liegke de Sjuuëlderhuuëgde (Scheulderhoogte) en de Lammerdel.

Parochie heilige Barbara

In 1869 weurt Sjuèlder, dat tot dan toe bie de parochie Wielder huèrde ’n eige parochie. De lètste 60 jaor waor Sjuèlder al ein eige rectoraat. De einbeukige, mergele Barbarakerk haet ‘ne neogotische tore oet 1904. ’n Houte, gepolychromeerd Barbarabeeld, gemaak door de Mestreechse beeldhouwer Jan van Steffeswert (1525) kump oarsjprónkelik oet de Barbarakapel, ‘n annexgeboew van ’t veurmalig gashoes. In de kèrk bevingk ziech ’n neogotisch örgel.
Bie de sjplietsing mèt de Sjuuëldersjteeg sjteit ’n Heilig-Hartbeeld gemaak van Franse kalksjtein mèt de inscriptie: Venite ad me omnes en Aan zijne koning en verlosser. Het vrome volk van Schulder.

Evenemente

De Kèrmes vingk plaats op de 2e zóndig nao Pinkstere.

Dörpsvereiniginge

• Voetbalvereiniging SV Gerendal
• Carnavalsvereiniging de Moelemaekersj
• Jónkheid Sjuuëlder
• Dartclub Scheulderheukske
• Zank St. Barbara
• Jeugclub 't Biejezjwermke