Gerlach

Van Wikipedia
(Doorverweze van Gerlachus)
Gank nao: navigatie, zeuke

Dit artikel is gesjreve in 't Houtems. 't Weurt gewaardeerd óm in dit artikel 't Houtems aan te hauwe of aan te gaeve welk anger dialek gebroek is.


Beeld van Gerlachus in zien kapel in Houtem-St.Gerlach

Gerlach, Gerlachus of Gièrling is 'ne katholieke heilige dae laefde in de 12e ièw in de buurt van Houtem in de hudige gemeinte Valkeberg in Nederlands Limburg.

Laeve[bewirk | brón bewèrke]

't Laeve van Gerlachus is besjreve in de Vita Beati Gerlaci Eremytae, ein laevesbesjrieving oet 1600, die ouch trukkiek op de verlore gegange ièrtsjte oetgaaf oet 1227, óngevaer 60 jaor nao ziene doad.

Hae waor 'ne ridder van adellike aafkóms, dae 'n lichzinnig laeve houw. Wie zien vrouw plotseling sjtorf, kaom hae tot 't inzich dat 'r neet good bezig waor en hae vertrok berves op baevaart nao Roame en Jeruzalem. Wie hae trukkaom góng 'r in 'n haol eik in Houtem wone. Hae mengde zien aete mèt esj en góng ederen daag op baevaart nao 't graaf van sint Servaos in Mestreech. Op zaoterdeg góng hae nao de Dom van Aoke. Väöl luuj bewónderde Gerlach um ziene laevessjtiel, meh de monnike van Meersje waore dao neet bliej mèt. Zie beklaagde zich bie de bisjop van Luuk, dae toen nao Houtem kaom en de eik leet kappe. Me houw häöm namelik wiesgemaak dat d'n hièremiet dao geld in verborge zou höbbe. Wie de bisjop door houw dat 'r verkièrd waor geïnformeerd, naom hae de zörg veur de kloezenaer op zich en leet van 't hout van de eik 'n huuske veur 'm boewe.

Gerlach woort ummer bekènder. Hildegard van Bingen sjtuurde häöm zelfs 't blómmekrenske dat zie bie häör wiejing houw gekrege. In 't jaor dat Gerlach sjtorf (1165 of 1166) zou 't water in de brón vlakbie zien kloes drie kièr in wien zin veranderd.

Verièring[bewirk | brón bewèrke]

De kèrk van Houtem is gewiejd aan de heilige Gerlachus. Midde in dees kèrk sjteit 't praalgraaf van Gerlachus. Bie dit praalgraaf is in januari 2009 e nuuj brónze sjrien geplaats mèt de relieke van de heilige. Ónder 't praalgraaf lik gezaegend (mergel)zand, dat 't viè zou besjerme en dat me maog mètnumme. De sjedel van Gerlach bevink zich in 'n zilvere reliekbuste oet 1704-1706. Dees buste sjteit in de sjatkamer van de kèrk van Houtem.

Op 5 januari, ziene sjterfdaag, is ziene fièsdaag gevolg door 'n octaaf.

Op 2 kilomaeter nao 't oaste lik in Sjtraobaek de Gièrlingshof oet de 19e ièw, mèt 'n beeld van häöm in de fronton van de middegevel.

In 2015 weurt 't Gerlachusjaor gevierd, 't is dan 850 jaor geleje dat Gerlachus gesjtorven is. 't Jaor begint mèt 't traditioneel octaaf. Op ziene namesdaag, 5 januari, zal 'n geavanceerde gezichsrecontructie (3D en Manchester methode) gepresenteerd waere. De incomplete sjedel zaot tot noe toe in 'n zilvere buste oet 1705. 't 'Nuuj' gezich van Gerlachus zal ge-exposeerd were in de sjatkamer van de Gerlachuskèrk.

Externe link[bewirk | brón bewèrke]

Brón[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Gerlach&oldid=362182"