Eduard Heger
Eduard Heger (3 mei 1976) is 'ne Slowaakse polletieker en waor de premier vaan Slowakije vaan 1 aprèl 2021 bis 15 mei 2023. Heer waor ierder de minister vaan financies (2020-2021) oonder premier Igor Matovič en lid vaan de Nationaole Raod. Heer waor prominint lid vaan de rechse polletieke partij Gewoen lui en oonaofhaankeleke persoene (Obyčajní ľudia a nezávislé osobnosti, OL'aNO). Zie maak deil oet vaan de christendemocratische Europese polletieke partij: de Europese Volkspartij. Hei make ouch de Nederlandse CDA en CU, de Duitse CDU en CSU en de Belzje CD&V en Les Engagés.
In 2023 wisselde heer evels vaan partij en woort heer de partijleier vaan de liberaol-conservatieve partij Demokrati (Democraote). De partij, vergeliekbaar mèt de Nederlandse VVD, de Vlaomse N-VA, de Waolse MR en de Duitse FDP, loog zoedaoneg wied vaan zien vörege partij aof tot dit d'r veur zörge tot 'n groet aontal ministers stopde in 2023. Dit dwong Heger tot aofstappe, boenao 'n technocratisch kabbinèt vaan Ľudovít Ódor euvernoom veur 'ne korten tied. Nao de verkezinge vaan 2023 woort Robert Fico obbenuits premier, dee dit al ierder waor vaan 2006 bis 2010 en vaan 2012 bis 2018.
Eduard Heger is 'nen euvertuigde Roems-Katheliek en centrum-conservatief es 't geit um sociaol posities wie drugs, abortie en LHBTI+-polletiek, mer stèlt ouch tot heer neet zelf wèl participere in polariserende discussies in Slowaokse maotsjappij. Heer heet veur zier versjèllende functies binne de Slowaakse Kathelieke kèrk gewèrk. Heer bekierde vaan atheïsme nao Christendom nao 't hiemele vaan ziene pap in 1999.