Ophaove (Zitterd)

Van Wikipedia
Naar navigatie springen Naar zoeken springen
Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, as te dit dialek sjpriks.

De ligking van Ophaoven inne gemèndje Zitterd-Gelaen.
Aanzich van aaj boerderieë en hoezer in Ophaove

Ophaove (Nederlandjs: Ophoven) is 'n wiek in 't zuje van Zitterd, inne Nederlandjs Limbörgse gemèndje Zitterd-Gelaen. Ophaove waas toet inne ieëste helf vannen twintjigsten ieëf e gehuch inne destiedse gemèndje Zitterd en is inmiddels oetgegreudj toet 'n geïntegreerdje woeanwiek van dees stad mit róndje 4060 inwoeaners in 2013.

Ligking[bewirk | brón bewèrke]

De wiek wuuertj gegrens door 't centrum van Zitterd in 't naorde, de buurt Leiebrouk in 't oeaste, de Middewaeg (N276) in 't zujen enne wiek Sanderbout in 't wèste. De grens mit Leiebrouk wuuertj gevörmp dore Gelaenbaek/Keutelbaek enne grens mit Sanderbout dore spaorlien Zitterd - Herzogenrath. De wiek wuuertj van naord nao zuud doorsneje dore veurmaolige riekswaeg Nimwege - Mestreech.

Gesjiechte[bewirk | brón bewèrke]

Ophaoven is e veurmaolig gehuch t'n zuje vanne historische stad Zitterd, vanoete stad gezeen stroumopwers ane Gelaenbaek. Hie-oet is ouch de naam aaf te leie, in vergelieking mit 't stroumaafwers gelaengen Euverhaove.

Juus wie de res van 't vreuger boetegebied van Zitterd haw Ophaove 'n agrarisch karakter. E groeat deil vanne oearsprunkelike beboewing van 't gehuch bestäöndje oet historische häöf en hoezer is nag dudelik te herkènne binne de hujige wiek es e lintj gelaenge langsen hujige Meulewaeg enne gelieknamige straot Ophaove (vreuger de Dörpsstraot). De litsgeneumdje straot waas veuren aanlègke vanne riekswaeg de wichtigste verbinjingswaeg tösse Zitterd en Gelaen. 'n Aantaal vanne aaj penj is verklaordj toet rieksmonument.

De ieëste steielike oetbreijinge begósten inne ieëste helf vannen twintjigsten ieëf mitte boew van arbeidersweuninge veur personeel vanne Staotsmiene. t'n Wèste vanne riekswaeg woort de mienwirkerskóllenie Tieënbunjer aangelag. Inne jaore neugetig woorten ane zuudkantj vanne wiek de groeatsjaolige nuujboewprojèkte Baekdal en Craaveld oetgeveurdj. Dees buurte zeen allemaol formeel ingedeildj bieje wiek Ophaove.

Tösse 1917 en 1934 haw Ophaoven 'n spaorwaeghalte ane spaorlien Zitterd - Herzogenrath, de stopplaats Ophaove.

In 1911 kreeg Ophaove zien eige rooms-kattelieke kirk, de Antonius van Paduakirk. Dees kirk woort in 2011 gesjlote.

Gemeinte Zittert-Gelaen
Sjtae en dörper: Bor · Beech · Buchte · Einikhoeze · Gelaen · Göttekaove · Houtem · Lömmerig · Munstergelaen · Opbeech · Papenhaove · Zittert
Buurtsjappe en gehuchte: Abshaove · Awt-Gelaen · Baandert · Broukzittert · Danike · Dassekoel · Europapark · Euverhaove · Gelaen-Zuid · Graasbrook · De Graathei · Haagzittert-park · Harrekaove · De Haze · Hazelderveldj · Hogenberg · Hóndjsbrook · Hoogveldj · Janskamperveldj · Kempehaof · De Kloes · Kolleberg · Kraonkel · Klein-Holtem · Laarhof · De Landjgraaf · Leiebrouk · De Lèndjheuvel · 't Lömmerigerveld · Lötterao · Mesjtreechterbaan · Ophaove · Rosengarten · Sanderbout · Sjpaans Neerbaek · Sjpaorkóllenie · Sjtadbrouk · Sjipperskèrk · Staaj · Vrangedaal · De Wèndjraak · Wolfrath
Kollenieë: Achbunjer · Teenbunjer
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Ophaove_(Zitterd)&oldid=429764"