Euverhaove

Van Wikipedia
Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, es te dit dialek sjpriks.

De ligking van Euverhaoven in Zitterd.
De H. Hart van Jezuskirk te Euverhaoven is e rieksmonument.

Euverhaoven is 'n woeanwiek in 't naorde van Zitterd.

Ligking[bewirk | brón bewèrke]

Dees wiek wuuertj ane naordelike kantj begrens door 't Industrieterrein Noord, in 't oeaste dore Gelaenbaek mit anen euverkantj 't recreatiegebied de Sjwienswei enne wiek Baandert. 't Zuje grens aan 't Centrum en in 't wèste grens 't ane wiek 't Lömmerigerveld. 't Wuuertj van die litste wiek gesjeie dore spaorlien Mestreech - Venlo.

Gesjiechte[bewirk | brón bewèrke]

De hujige wiek Euverhaoven is óntstangen oet e gehuch gelaenge kórt boete de sjaotsveljer vanne historische stad Zitterd. Dit gehuch waas gelaengen aan 'ne waeg dae aevewiejig ane Gelaenbaek leep. Deze waeg waas veuren aanlègk vanne riekswaeg Nimwege - Mestreech de wichtigste verbinjingswaeg tösse de stej Zitterd en De Nuujstad. De straotnaam Euverhaoven is noe nag ummer euvergebleven es 'n herinjering aan 't verloup van dit veurmaolig lintjdörp. De ligking langs de baek verklaortj ouch de naam, stroumsaafwers ("euver") gelaengen ane Gelaenbaek vanoet Zitterd gezeen, in vergelieking mit Ophaove, det stroumopwers ("op") is gelaenge. Vanwaenge de hiej gelaenge vröchbaar lösgrunj van 't baekdaal óntsting hie 'n agrarische gemeinsjap. Inkel historische häöf en hoezer langs de straot Euverhaoven en ziejstraoten hievan zeen noe nag bewaardj gebleven en aome nag einigszins 't lenjelik karakter oet det dees gemeinsjap in 't verleje kanj. De res vanne wiek haet aevel e steielik karakter. Euverhaove maakdje al inne Middelieëve deil oet vanne hieërlikheid Zitterd enne landjboew haet hie nag toet inne ieëste helf vanne twintjigsten ieëf de veurnaamste rol gespeeldj toet 't oetgreudje toet 'n arbeiderswiek.

Vanaaf 't jaor 1920 vestigdje zich t'n naorde van 't gehuch arbeiders vanne Staotsmienen in 'n nuuj aangelagdje woeanwiek, 'n zoeageneumdje "mienwirkerskóllenie". De ieëste weuning, de weuninggroep Euverhaovenerhei, woorte geboedj langs de hujige Heistraot en Sint Petrusstraot nao 'n óntwirp vanne arsjitek Jan Stuyt. Dees weuninggroep is verklaordj toet rieksmonument. Inne opvolgendje decennia brèdje de buurt zich ummer mieër oet en vörmdje oetènjelik e gehieël mitte bestäöndje gemeinsjap. In 1922 woort 'n noeadkirk geboedj inne wiek die noe nag besteitj es gemeinsjapshoes. In 1926 woort hienaeve 'n rectoraatsweuning annex kloeaster geboedj. De hujige parochiekirk, de H. Hart ven Jezuskirk, woort geboedj in 1929 nao 'n óntwirp vanne Zitterdse arsjitek Jos Wielders. Ouch al dees geboewe zeen verklaordj toet rieksmonument. Bieje kirk steitj 'n Heilig Hartbild van Charles Vos.

In 1946 woort bie Euverhaove e nuuj productiebedrief van Philips opgerich, wo toet 2009 óngerdeiler veur beeldbuzen en monitoren en displays woorte geproduceerdj. Dit bedrief is jaorelang 'ne wichtige wirkgaever gewaes veure bewoeaners van Euverhaoven en Zitterd mit 2150 wirknummers in 1975. Róndj dit bedrief óntsting 't Industrieterrein Noord, allewiel 't grótste bedriefsterrein van Zitterd.

Veurzeninge[bewirk | brón bewèrke]

Euverhaove haet koum veurzeninge. Vanwaenge de ligking kórtbie 't centrum van Zitterd is 't veural dao-op aangeweze. De ligking kórtbieje Sjwienswei veurzuutj in recreatieruumdje. 't Haet wiejer e klein aantaal speeltuinen en väöl vereine zeen d'r actief, worónger de amateurvoetbalklöb VV DVO die spelen op 't Frans Erkens Sportcomplex.

Gemeinte Zittert-Gelaen
Sjtae en dörper: Bor · Beech · Buchte · Einikhoeze · Gelaen · Göttekaove · Houtem · Lömmerig · Munstergelaen · Opbeech · Papenhaove · Zittert
Buurtsjappe en gehuchte: Abshaove · Awt-Gelaen · Baandert · Broukzittert · Danike · Dassekoel · Europapark · Euverhaove · Gelaen-Zuid · Graasbrook · De Graathei · Haagzittert-park · Harrekaove · De Haze · Hazelderveldj · Hogenberg · Hóndjsbrook · Hoogveldj · Janskamperveldj · Kempehaof · De Kloes · Kolleberg · Kraonkel · Klein-Holtem · Laarhof · De Landjgraaf · Leiebrouk · De Lèndjheuvel · 't Lömmerigerveld · Lötterao · Mesjtreechterbaan · Ophaove · Rosengarten · Sanderbout · Sjpaans Neerbaek · Sjpaorkóllenie · Sjtadbrouk · Sjipperskèrk · Staaj · Vrangedaal · De Wèndjraak · Wolfrath
Kollenieë: Achbunjer · Teenbunjer
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Euverhaove&oldid=451474"