Keutelbaek

Van Wikipedia
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Baeks, es te dit dialek sjpriks.

De Keutelbaek, ouch waal Cötelbaek, is 'n ziejbaek van de Gelaenbaek, of eigelik waas 'n ziejbaek van de Gelaenbaek.

Van de hujige baek is allein de baoveloup tot aan Neerbaek nog euvergebleve. Ze óntsjprunk in Kelmond, 'n buurtsjap beheuërend biej de gemeinte Baek en meandert vervolges langs de buurtsjap Geverik nao de viever biej 't kesjteël Genbroek. Vanoet deze viever wirt 't water gedoseerd aafgeveurd nao 't puntj wo 't es baekske en via ein (gedeiltelikke) euverkloezing in de richting van Baek sjtruimt. In de oarsjprunkelike sjtaot leep de baek door de kern van Baek, vervolges door Neerbaek, Sjpaans Neerbaek, Kraonkel en Awt-Gelaen, wo ze dan oetmóndje in de Gelaenbaek. In vreuger tieje woort 't baekwater benut door 'n aantal laerloajerieje in Baek, Kraonkel en Awt-Gelaen.

In 't verleje haet me de baek euverkloesd vanaaf 't puntj dat dit revierke de gemeinte Baek bènnelöp tot aan de móndjing in de Gelaenbaek in Awt-Gelaen, en 't euverkloesde deil is tegeliekertied óngerdeil gewore van de gemeintelike riole van de gemeintes Baek en Gelaen. De aafveure van 't baekwater en de riolering zint aangesjlaote op de Rioolwater Zuiveringsinstallatie.

Aanvank 21-ste eëuw woorte d'r planne gemaak óm de euverkloezinge in de gemeinte Baek weer te verwiejere en de baek ziene natuurlikke loup weer trök te gaeve. Dees planne krege greun leech toen d'r in december 2008 door de Baekse gemeinteraod woort ingesjtömd mèt de óntkloezing van de Keutelebaek. De oetveuring is door 't Waterschap Roer en Overmaas ter handj genómme, de euverkloezinge zint weer weggehaold, de baek meandert in de gemeinte Baek weer es van awts en zoa is de natuurlikke aafveur van baekwater en revierwater weer hersjtèld.

Brón[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Keutelbaek&oldid=394508"