Hoek van Holland

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Hoek van Holland (Hollands: De Hoek) is e dörp en stadsdeil in de Zuid-Hollandse gemeinte Rotterdam. De plaots ligk gans in 't weste vaan die gemeinte, aon de Noordzie, kilometers vaan de stad Rotterdam, en maak geografisch deil oet vaan 't Westland. Ind negentienden iew oontstande es handelsplaots bij de nuie Maosmoond en later tot bleuj gekoume es arbeiersdörp veur de ummer greujende have vaan Rotterdam, steit Hoek van Holland ouch bekind es badplaots, veural veur de Rotterdamse bevolking.

Historie[bewirk | brón bewèrke]

De naom Hoek van Holland waor al iewelaank in gebruuk veur de zuidwespunt vaan 't Hollands vasteland, op de plaots dus boe de Maosmoond 'nen hook maak(de) mèt de Noordzie. D'n awwe maosmoond laog get zuieleker es d'n huiege, bij Brielle; dees plaots is allewijl vergrave tot de Maosvlaakde.

Umtot de Maosmoond in de loup vaan de iewe verzandde, besloot me vaanoet Rotterdam tot 't grave vaan 'ne nuie Maosmoond. Heiveur deepde me 't Scheur oet, 'n zijtak vaan de Nui Maos in dit gebeed, en trok me dit water rechoet door nao zie. Dit woort de Nuie Waterweeg, dee e paar kilometer zuielek vaan 's-Gravenzande in zie oetkaom. 't Projek begós in 1866 en waor twie jaor later veerdeg.

Bij de nuie Maosmoond vestegde ziech versjèllende arbeiers en personeel vaan Rijkswaterstaat. Dit pläötske greujde laankzaamaon oet tot 'n ech dörp, wat bij de bewoeners veurde tot de wuns ziech los te make. In plaots daovaan besloot me evels in 1914 Hoek van Holland euver te bringe nao de gemeinte Rotterdam. Nao d'n Ierste Wereldoorlog oontwikkelde ziech 't strandtoerisme hei sterk. In d'n Twiede Wereldoorlog woort e groet deil vaan 't dörp gesloop veur d'n Atlantikwall, dee hei bij de Maosmoond bezunder good mós weure verdeideg. Heidoor is 't dörp mie laandinweerts koume te ligke.

Aonzien[bewirk | brón bewèrke]

Hoek van Holland besteit oet versjèllende wieke. Wie gezag ligk 't aajd dörp korter bij zie es de nuibouwwieke; die lèste deginne op zoe'n 500 meter aofstand vaan de dörpskern. Op de plaots boe de bezètter 't dörp heet gesloop veur d'n Atlantikwall, zien zoe'n hoonderd bunkers gebouwd die nog ummer stoon en deils te beziechtege zien. Zuidoostelek vaan 't aajd dörp gief 't nog e Nederlands fort oet 1881; ouch dit is te beziechtege. Hoek van Holland tèlt in totaol 11 rieksmonuminte; de mieste daovaan hure bij 't fortcomplex.[1] Noordelek vaan 't dörp ligk de wiek Strand en Duin, veural op toeriste geriech meh ouch mèt permanente bewoening.

Roontelum 't dörp is vaanajds al hiel väöl toerisme (strandtente, campings etc.), meh me heet ouch hei en dao 't lendelek karakter kinne bewoere. Wie in gans 't Westland stoon bij Hoek van Holland väöl breujkasse.

Verkier[bewirk | brón bewèrke]

Hoek van Holland is 't indpunt vaan de Hoekse Lijn, boe-aon 't dörp wel twie staties heet: Hoek van Holland Haven en Hoek van Holland Strand (indpunt). D'n trein kump vaanoet Rotterdam Centraol aonvare en deit oonderweeg ouch Schiedam, Vlaardingen en Maassluis aon.

Bevolking[bewirk | brón bewèrke]

Hoek van Holland had in 2012 9.940 inwoeners. Daovaan waor d'n euvergroete mierderheid (88%) otochtoon. 8% waor westersen allochtoon, 4% neet-westers.[2]

Politiek[bewirk | brón bewèrke]

Hoek van Holland waor tot 2014 'n deilgemeinte, zij 't 'n rillatief klein. Allewijl is 't e stadsdeil, wat evels nog ummer zien eige gebeedscommissie keus. De samestèllinge waore de aofgeloupe jaore:

Partij 2006 2010 2014
Hoekse Zaken - 2 4
VVD 2 4 3
Lies P. Stok - - 2
PvdA 5 3 1
CDA 5 2 1
Leefbaar Rotterdam - 2 -
Lies Aad Spaans 1 - -
Totaol 13 13 11

In zoewel 2006 es 2010 woort de deilgemeinte bestuurd door e colleesj vaan VVD en PvdA.

Waope[bewirk | brón bewèrke]

Officieus waope vaan Hoek van Holland.

Vaan Hoek van Holland besteit 'n oonofficieel waope, wat ziech zoe liet umsjrieve:

Gedeild in drei: I vaan sinopel (greun) en e hoof vaan goud (geel), II vaan zèlver (wit); II wie drei meh mèt 'ne rechterhook (veur de beziener links) vaan goud mèt dao-in 'ne liew vaan keel (roed); alles veurzeen vaan e sjèldhoof vaan zèlver mèt e sjeepsraad vaan sabel (zwart).

't Waope gief de ligking vaan 't dörp weer, mèt 't water in 't zèlver (bove de zie, midde de Maos), de duine en 't strand in 't goud, 't achterland (wat hei vreuger laog) in 't greun en 't dörp sprekend oetgebeeld es 't Hollands waope in 'nen hook, op de plaots boe 't dörp inderdaod ligk. Daobij zien de kleure sinopel-zèlver-sinopel 't waope vaan Rotterdam. 't Sjeepsraad gief de oontstoonsrei vaan 't dörp weer.[3]

Bronne[bewirk | brón bewèrke]

Dit artikel is gooddeils gebaseerd op 't corresponderend Nederlandstaoleg artikel, en wel in dees versie.

Rifferenties[bewirk | brón bewèrke]

  1. Rieksmonuminte in Hoek van Holland
  2. CBS Statline - Bevolking en allochtone in Hoek van Holland
  3. Heraldrywiki - Hoek van Holland

Extern links[bewirk | brón bewèrke]

Rotterdam: Sjtadsdeile, opgelufde gemeintes en dörpsgemeinsjappe

Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg)

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Hoek_van_Holland&oldid=368491"