Prins Alexander (Rotterdam)

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Ligking vaan Prins Alexander in de gemeinte Rotterdam

Prins Alexander is 't oostelekste en volkriekste stadsdeil vaan de Nederlandse gemeinte Rotterdam. 't Stadsdeil is geneump nao de Prins Alexanderpolder en ligk op groond dee pas (wied) nao d'n Twiede Wereldoorlog bij Rotterdam is geveug, veural te koste vaan Capelle aan den IJssel. Door zienen umvaank en isolatie vaan de binnestad functioneert 't min of mie wie 'n stad op ziech. Neve woeninge herberg dit stadsdeil ouch 'n groete middestand en väöl industrie.

Historie[bewirk | brón bewèrke]

In de umgeving vaan Rotterdam woort in d'n achtienden en negentienden iew zier väöl törf gestoke. 't Veen woort tot op de kleilaog aofgegrave. Zoe verdwene ganse polders in de regio um es brandstof versteuk te weure, en oontstoonte wij pole mèt hei en dao 'nen awwe weeg detössedoor. 't Aajd dörp Kralingen raakde zoe oontvolk en ouch 't achterland vaan Capelle aan den IJssel, Nieuwerkerk aan den IJssel en Zevenhuizen kaom oonder water te stoon. Ind negentienden iew besloot me de mieste pole weer druug te lègke. Zoe oontstoonte twie groetsjaolege polders: de Prins Alexanderpolder en de Zuidplaspolder. De vervening waor hei zoe grundeg gebäörd, tot de groond soms bekans zeve meter oonder de waterspegel laog. Neet laank nao 't veerdeg koume vaan de Prins Alexanderpolder woort de gemeinte Kralingen opgeluf. 't Westelek deil góng nao Rotterdam, 't oostelek deil woort bij Capelle geveug.

Rotterdam had Kralingen astrein bebouwd, en had ziech ouch in noord-, wes- en zuidwaartse riechting oetgebreid. In 1941 annexeerden 't neet allein veer gemeintes, meh woort ouch e groet deil vaan d'n Alexanderpolder bij de stad geveug.[1] Wijer grenscorrecties volgde, tot in 1995 ouch e stök vaan Nieuwerkerk aan den IJssel en Zevenhuizen-Moerkapelle woort geannexeerd. De bebouwing volgde in versjèllende golve vaan 1961 tot deep in d'n einentwintegsten iew. Nog ummertouw wèlt Rotterdam aon zien oosgrens mie gebeed annexere, veural umtot 't engsteg is veur de concurrentie vaan veurstei.[2]

Umvaank, indeiling en karakter[bewirk | brón bewèrke]

Prins Alexander vörmp 'n soort twielingstad mèt Capelle aan den IJssel. Dees gemeinte heet al-evel väöl mote aofstoon aon Rotterdam, meh heet de euvergebleve deile zelf ouch tot nuibouwwieke oontwikkeld. Allewijl is de situatie zoe:

Tot Rotterdam (stadsdeil Prins Alexander) huurt:[3]

  • Zoe good wie alles bove d'n A20 (Ommoord, Zevenkamp, Nesselande);
  • Alles noordelek vaan de gecombineerde metrolijne A, B en C en westelek vaan de Prins Alexanderlaan (Lage Land, Prinsenland, 's-Gravenland);
  • E terrein oostelek vaan de Prins Alexanderlaan en westelek vaan de Capelseweg (Oosterflank);
  • 't (veurmaoleg) Dörp Kralingse Veer.

Bij Capelle aan den IJssel huurt:[4]

  • 't Aajd dörp Capelle en alle aandere groond tösse d'n Hollandsen IJssel, d'n N210 en d'n N219 (Het Slot, De Terp);
  • De stadsdeile Schollevaar (zuielek vaan d'n A20 en oostelek vaan de Capelseweg) en Schenkel (westelek vaan de Capelseweg en oostelek vaan de Middeltocht);
  • De nuibouwwieke zuielek en westelek vaan d'n N210 (Componistenbuurt en Zeeliedenbuurt);
  • De bedrieveterreine Fascinatio en Rivium, respectievelek noordelek en zuielek vaan d'n N210 en allebei tege d'n A16 aon.

Ommoord[bewirk | brón bewèrke]

Geneump nao d'n Ommoordse polder, deen 't hei veur de vervening gaof. Dit waor ein vaan de ierste wieke vaan Prins Alexander en is ein vaan de groetste. Me vint hei nuibouwwieke oet versjèllende merretsegminte, zoewel flats wie rijkeshoezer. De lèste decennia is ouch dees wiek achteroetgegaange, zoetot ze de aondach vaan de (deil)gemeinte nujeg had.

Zevenkamp[bewirk | brón bewèrke]

Oostelek vaan Ommoord. De groond kaom in 1978 in Rotterdamse han en woort al direk 't jaor dao-op bebouwd. De wiek is rillatief volks vaan karakter.

Het Lage Land[bewirk | brón bewèrke]

Oonmiddelek zuielek vaan de spoorlijn Rotterdam-Utrech en daorum good te bereike. Geneump nao 't liegste punt vaan de ganse polder. Dit stadsdeil is tegeliek mèt Ommoord gerealiseerd.

Oosterflank[bewirk | brón bewèrke]

Oostelek vaan Het Lage Land. Hei vint me de statie Rotterdam Alexander; de wiek is daorum zier good bereikbaar. 't Gief in d'n Oosterflank e zier groet winkelcentrum, de Woonmall Alexandrium, en väöl hoegbouw.

Prinsenland[bewirk | brón bewèrke]

Zuielek vaan Het Lage Land en oongeveer tegeliek oontstande. Ouch dit is 'n gemêleerde wiek, boe volkse hoegbouw neve sjieker hoezer steit. In 't huieg Prinsenland leep e groet deil vaan 't aajd dörp Kralingen. Veur d'n inpoldering waor de Veenweg (de aw dörpsstraot vaan Kralingen) dao nog vaan euver; allewijl gief 't allein nog d'n awwe kèrkef in 't Prinsenpark, dee ziech es 'ne veenbölt bove 't mejveld verluf. Verwarrend genoog löp door de wiek ouch nog de Kralingseweg; dit is de polderweeg vaan Capelle nao Nui-Kralingen.

's-Gravenland[bewirk | brón bewèrke]

De umgeving vaan de 's-Gravenweg, de veurtzètting vaan de Kralingsen Oudendijk in de riechting vaan Capelle.

Nesselande[bewirk | brón bewèrke]

In 't uterste noordooste vaan Prins Alexander en de ganse gemeinte Rotterdam, oostelek nog vaan Zevenkamp. Dit stök woort in 1995 geannexeerd en pas vaanaof 2000 es Vinexlocatie bebouwd. In 2012 kaome de lèste woeninge veerdeg. De bebwouing is middeklassegeriech en hei en dao get historiserend (jaore daarteg-echteg) vaan karakter.

Kralingse Veer[bewirk | brón bewèrke]

'n Aajd dörpke, veurheer in de gemeinte Kralingen, later Capelle aan den IJssel en tot slot Rotterdam. Door 'ne groondruil is 't 'n enclaaf vaan die stad in Capels gebeed. De plaots hèt nao 't poontveer euver d'n Hollandse IJssel daan wel de Noord nao IJsselmonde wat hei iewelaank laog. Door de koms vaan de Van Brienenoordbrögk woort 't euverbojeg.

Verkier[bewirk | brón bewèrke]

Statie Rotterdam Alexander bij valaovend. Zoewel de spoorweg wie de metrolijn zien ziechbaar.

Dweers door 't stadsdeil löp d'n A20. Bij d'n aafslaag Capelle aan den IJssel kin me Prins Alexander inrije. Haaks op d'n A20 kump d'n A16 binne, dee hei indeg en oetkump op 't knouppunt Terbregseplein. Door Prins Alexander loupe versjèllende brei vaarweeg.

Ouch dweers door Prins Alexander, en wie d'n A20 in wes-oosriechting, löp de Rijnspoorweg, beter bekind es de spoorlijn Rotterdam-Utrech. Die heet in dit stadsdeil 'n statie, Rotterdam Alexander, boe d'n intercity stop. De groete beteikenis vaan dit transferium dreug sterk bij aon 't zelfstendeg karakter vaan Prins Alexander. Wijer weurt 't stadsdeil good veurzeen door de Rotterdamse metro. De drei lijne A, B en C koume nog gezamelek de wiek in bij statie Capelsebrug. Daan drejje lijne A en B nao 't noorde touw, boe ze bij statie Alexander kruise mèt de spoorweeg (zoetot me dao kin euverstappe). In Ommoord splitse ze ziech: lijn A geit nao 't westelek deil vaan die wiek, lijn B löp oostelek door tot in Nesselande. Metrolijn C kump oet in Capellle aan den IJssel. Alle drei de lijne zien vaanaof statie Capelsebrug neet mie oondergroonds, meh parterre, zoetot de metro 't karakter vaan sneltram heet.

Politiek[bewirk | brón bewèrke]

Wie de aander stadsdeile vaan Rotterdam (Pernis oetgezunderd) waor Prins Alexander tot 2014 'n deilgemeinte mèt 'nen eige deilraod en bevooghede die kortbij die vaan 'n gemeinte kaome. Nao de verkezinge vaan dat jaor is de zelfstendegheid sterk beperk; de raod hèt noe gebeedscommissie.

De verkezingsoetsleeg waore de lèste jaore de volgende:

Partij 2006 2010 2014
Leefbaar Rotterdam 9 9 6
PvdA 7 6 2
VVD 2 3 1
GroenLinks 1 2 1
D66 - 2 2
CDA 3 2 1
ChristenUnie/SGP 1 1 -
SP 2 - 2
Totaol 25 25 15

In 2006 gaof 't e breid colleesj vaan PvdA, SP, VVD, ChistenUnie/SGP en GroenLinks. Vaanaof 2010 regeerde 'n mierderheid vaan Leefbaar Rotterdam, VVD en D66.

Bevolking[bewirk | brón bewèrke]

Mèt zoe'n 95.000 inwoeners (93.985) heet Prins Alexander d'n umvaank vaan 'n middelgroete stad en is 't groeter es welk aander Rotterdams stadsdeil daan ouch. Die mieste lui woene in Ommoord: 24.785 in 2012. Daan volg Zevenkamp (16.460 lui), daan kort achterein Nesselande (11.580; dink traon tot de wiek nog neet gans waor oetoontwikkeld bij de opstèlling vaan dees ciefers!), Oosterflank (10.635), Het Lage Land (10.370) en Prinsenland (10.015), mèt 's-Gravenland op einegen aofstand (8.435). In 't dörpke Kralingse Veer woende toen 1.695 lui.[5] (Alle ciefers zien aofgerun dop ganse vieftalle.)

Etnische samestèlling[bewirk | brón bewèrke]

Veur Rotterdamse begrippe is Prins Alexander e bovegemiddeld 'blaank' stadsdeil. In totaol tèlt 't 68% otochtone, 10% westerse allochtone en 22% neet-westerse allochtone. Die lèste zien veur 't groetste deil (8%pt.) Surinamers; Marokkaone, Antilliaone en Turke woene hei mer wieneg. 't Mies divers (mèt 30% neet-westerse allochtone) zien nog Zevenkamp en Oosterflank.[5]

Bronne[bewirk | brón bewèrke]

Veur dit artikel is oonder mie gebruuk gemaak vaan 't corresponderend Nederlandstaoleg artikel, en wel in dees versie; wijer koume bittekes informatie vaan de individueel artikele euver de versjèllende wieke.

Rifferenties[bewirk | brón bewèrke]

  1. Grote Winkler Prins, zevenden drök: dl. 16, p. 562
  2. Cobouw.nl - Rotterdam blijft bij annexatie Zuidplaspolder
  3. Google Maps - Umvaank vaan Prins Alexander. (N.B.: 's-Gravenland is abusief neet gans bij Prins Alexander ingeteikend. Tot 't toch neet bij Capelle huurt, zuut me op de volgende link.)
  4. Google Maps - Umvaank Capelle aan den IJssel
  5. 5,0 5,1 CBS Statline - Bevolking en allochtone in Prins Alexander en zien individueel wieke (2012)

Externe link[bewirk | brón bewèrke]

Rotterdam: Sjtadsdeile, opgelufde gemeintes en dörpsgemeinsjappe

Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg)