Schiedam

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Schiedam is 'n stad en gemeinte in de Nederlandse provincie Zuid-Holland, mèt per 1 juni 2005 75.066 inwoeners. De stad ligk aon d'n hook vaan de Schie en de Nui Maos, t'n ooste vaan Rotterdam. Inmiddels is 't 'n veurstad pur sang vaan dees stad.

Stadsfuncties

Schiedam is veural 'n slaopstad veur Rotterdam en is zoe ouch groet gewore. De sjeepsbouw is inmiddels oet de stad verdwene, en 't zjeneverstoeke is beperk tot e paar stoekerije. Schiedam heet gooj verbindinge mèt Rotterdam.

Stadsgeziech

Allewel tot de stad väöl nuibouwwieke kint heet ze ouch 'n intersant stadscentrum. 't Meis opvallend zien de vief stèllingmeules: ze zien de hoegste te wereld. Me heet ze zoe gebouwd veur oonder de meulenerm de pakhoezer te kinne bouwe. Ouch vint me 'n rewien in de umgeving en steit dao 'n basiliek gewijd aon Sint-Lidwina.

Historie

Schiedam oontstoon roond 1250 aon 'nen dam, gebouwd door edelmaan Dirk Bokel in de Schie veur 't ziewater weg te hawwe. De plaots bleujde op es handelscentrum en kraog al in 1275 stadsrechte, meh góng in de veertiende iew weer t'n oonder aon de concurrentie vaan Rotterdam en Delf, welke lèste plaots tösse Rotterdam en Schiedam in Delfshave aonlag. Wel bleef de stad belangriek veur de vèsserij, veural op hering, en bleujde de devotie roond Sint-Lidwina, 'n plaotseleke heilege.

Nao 'n trökval kaom de plaots in de achtiende iew weer sterk op wie de zjeneverstoekerij dao beofend raakde. Dit had es direkte oorzaak tot d'n drankimport oet Frankriek stèlgevalle waor. In de negetiende en twintegste iew bleujde de sjeepsbouw oonder d'n ummer greujende Rotterdamsen have. Inmiddels is die ouch weer verdwene.