Borschemich
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Borschemich woar e dörp i g'n Duutsje gemingde Erkelens i g'ne deelsjtaat Noordrien-Wesfale, neet wied van Remung. 't Loog tusje Keyenberg, Wanlo, Hochneukirch, Holz, Otseroa en Sjpenroa in. Get wiejer noa 't zude ligke Lutseroa en Immeroa. Borschemich loog in 't gebeed van de koel Garzweiler II en woar óngerdeel van e groeëter gebeed wat weëd aafgegrave vuur de winning van broenkoale.
In 2007 houw 't nog 520 iwuuenesj. In dat joar kóste de ieësjte luuj verhoeze en de letste bewuuenesj vertrokke in 2017. Direk ten noorde va g'n sjtad Erkelens woeëd e compleet nui dörp oet d'r grónk gesjtamp. Dit sjtadsdeel grens aan 't nui Keyenberg, Berveroa, Westrich en Kuckum en heesj officieel Borschemich (neu). In 2022 woeënde doa zó'n 570 luuj.
De plaatsj woeëd in 898 vuur 't ieësj in 'n oerkonde geneumd. Zie heesjde Birsmiki. In e historisj document oet 1396 kunt de sjriefwies Bursmich vuur en in 1618 Borschemich. 't Woaddeel -mich betekent baak. Borschemich loog aan 't reveerke de Köhm en woar al in d'r tied van de Romeine bewoeënd.
Borschemich woar e agrarisj dörp. Beeldbepalend woare de versjeie höaf. E aantal doava woar in bezit va kloeësterordes. In 't dörp loog ooch 'n monumentaal burch van de adlige familie Pallandt (Haus Paland). Ieëwelank hat 't dörp tot 't hertogdóm Jöllesch gehuurd. Noa d'r Franzuuesisje tied ging 't definitief uuever noa Pruse.
Óp d'r 27e fibberwaar 1945 woeëd Borschemich veroverd durch de Amerikane in 't kader van Operation Grenade.
D'r sjloop van 't dörp begós in 2012. De Sint-Martinuskirk woeëd in 2014 gesjloop en e joar sjpieëder de burch. In 't nui dörp sjteet 'n kapel die ooch gewied is aan d'r Martinus.
-
De Sint-Martinuskirk -
Haus Paland, dees börch loog hinger de kirk -
'n Sjtroat mit leëgsjtoande hoezer in 2010, veëntjes van 't letste sjuttersfieës van 't dörp -
't Nui dörp
