Immeroa

Van Wikipedia

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.


Aod-Immeroa

Immeroa (Duutsj: Immerath) woar e dörp i g'n Duutsje gemingde Erkelens i g'ne deelsjtaat Noordrien-Wesfale. 't Loog tusje Holzweiler, Lutseroa, Sjpenroa, Pesch en Jackeroa in. Immeroa loog in 't gebeed van de koel Garzweiler II en woar óngerdeel van e groeëter gebeed wat weëd aafgegrave vuur de winning van broenkoale. In 1970 houw 't zó'n 1500 iwuuenesj, in 2008 óngevier 700.

In 2006 kóste de ieësjte luuj verhoeze. Get ten zuudoeëste van Erkelens woeëd e compleet nui dörp oet d'r grónk gesjtamp. Dit sjtadsdeel grens aan 't dörp Kukhaove en heesj officieel Immerath (neu). In 2022 woeënde doa zó'n 843 luuj.

De plaatsj woeëd in 1144 vuur 't ieësj in 'n oerkonde geneumd. Zie heesjde Emundrode. In historisje documente zint ooch de nieëkste name truuk te vinge: Emenrait (1530) en Emeradt (1666). 't Suffix rode (rath in 't Duutsj en roa/rao(j) in 't Limburgs) betekent óntgonne plek. 't Ieësjte woaddeel geet truuk óp d'r Aodhoeëgduutsje naam Aiwismund. Ieëwelank hat 't dörp tot 't hertogdóm Jöllesch gehuurd. Noa d'r Franzuuesisje tied ging 't definitief uuever noa Pruse.

't Is wie alle dörper in de wiej umgeëving e agrarisj dörp mit e aantal höaf, woeëva sommige i bezit woare va kloeësterordes. In 't dörp sjtóng ooch 'n kliniek vuur vrouwe mit epilepsie van de Dochtere van 't Hl. Kruuts (Haus Nazareth). De patiënte mit dees krenkde woeëde durch de nationaalsocialiste autoritete es óngewunsj besjouwd en in 't kader van Aktion T4 vermoord.

Óp d'r 27e fibberwaar 1945 woeëd Immeroa veroverd durch de Amerikane in 't kader van Operation Grenade.

D'r sjloop van 't dörp begós in 2013. De monumentaal Sint-Lambertuskirk woeëd in 2018 gesjloop. In 't nui dörp gieëf 't 'n kapel die aan d'r Mesjtreechter hillige is gewied.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Immeroa&oldid=458320"