Zeurich

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Zeurich (Pruus: Zürich, Alemannisch: Züri, Italiaans: Zurigo, Retoromaans: Turitg, Letien: Turicum, Ingels: Zurich) is de grótste stad van Zwitserlandj en is de houfstad van 't kanton Zürich. Zürich ligk ane revere de Limmat enne Sihl, in e breid daal aan 't maer van Zeurich (Zürichsee). 't Gebied wuuertj al mieër es twieëdoezjendj jaor bewoeandj. Zeurich is 't economisch centrum van Zwitserlandj. Alle wichtige banke höbben hie 'n vestiging. De Zwitserse buuers is hie gevestig en ouch is 't de hanjelsplaats veur goud inne werreld.

Zeurich steit vanaads ouch bekindj es plaats veur vriedinkers. Lenin verbleef hie innen tied veure revolutie in Röslandj en 't dadaïsme is hie óntstange. Zoeawaal de Ierse sjriever James Joyce es d'n Duutsje Nobelprieswinner Thomas Mann ligken in Zeurich begrave. Op cultureel gebied zeen 's väöl musea. Mit naam 't Kunsthaus haet 'n breid-erkindje collectie.

Belangrieke geboewe zeen de Grossmünster, 't Kunsthaus Zürich, de ETH en Universiteit en 't Heidi Weber Haus van de Zwitserse architect Le Corbusier. 't Gróts jaorliks trögkkieërendj evenement is de Street Parade, op de twieëdje zaoterdig in augustus.

Demografie

d'r Weune zoeaget 380.000 luuj in Zeurich (in 2010) en daomit is 't de grótste stad van Zwitserlandj. Van alle geregistreerdje inweuners is 30,6% neet vanne Zwitserse nationaliteit (veur e groeat deil Duutsje en Italiane). De bevólking vanne stad inclusief de veurstei is ruum e miljoen. De officiële taal die dore euverheid gebroek wuuertj is Pruusj, dewiel de meiste luuj Zwitsjerpruusj kalle: 77,7% vanne bevolking haet (Zwitser)Duutsj es moderspraok, 4,7% Italiaans, 2,2% Zuud-Slavisch (Servokroatisch, Macedonisch, Sloveens of Bölgaars), 2,2% Spaans, 2,1% Frans, 1,8% Ingels, 1,6% Portugees en 1,5% Albanees. 33,3% vanne bevólking is leed vanne Katholieke Kirk.