Vrangedaal

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, es te dit dialek sjpriks.

---

De ligking van Vrangedaal in Zitterd.

Vrange(n)daal (Nederlandjs: Vrangendael) is 'n stadswiek van Zitterd.

Ligking

Vrangedaal is 'n woeanwiek die in 't oeaste van Zitterd ligk, ane randj vanne stad. t'n Naorde vanne wiek bevinje zich de wiek Sjtadbrouk enne aaj dörpskern van Broukzitterd. In 't oeaste bevinje zich de buurte Kempenhaof en Laarhaof, die óngere wiek Kemperkoul valle. Wiejer grens de wiek in 't zujen aan 't boetegebied róndje Kolleberg en in 't wèsten aan 't centrum.

Gesjiechte

't Gebied wo de wiek ligk waas toet inne jaore fieftig vannen twintjigsten ieëf 'n aop agrarisch gebied boete de stad det vreuger verdeildj waas euvere gemèndje Zitterd en Broukzitterd. Vanaaf 1960 woorte hie de ieëste weuninge geboedj en in 1962 woort hie 'n ieëste noeadkirk in gebrok genómme die e jaor later zów waere vervange door e diffenitief kirkgeboew, de paróchekirk Kristus-Hemelvaart. Doren aanlègk van dees wiek is de aaj, vreuger aafzunjerlik gelaenge, dörpskern van Broukzitterd vasgeboedj ane res vanne steielike beboewing van Zitterd. Toete jaore tachetig bleef Vrangedaal gelaengen anen oeastelike stadsrandj, toete kóms vanne nuujboewperjèkte Kempenhaof en Laarhaof.

Kènmirke

Vrangedaal wuuertj gekènmirk door e groeat aantaal aan portiekflats oete jaore sèstig in 't zujelik deil vanne wiek. Wiejer bevinje zich hie veurnamelik twieë-ónger-ein-kapweuninge. Historische beboewing is praktisch neet te vinje.