Verdrage vaan Locarno

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


De Boetelandse Affaires-minister vaan Duitsland (Gustav Stresemann), 't VK (Austen Chamberlain) en Fraankriek Aristide Briand bij oonderhandelinge vaan Locarno

De Verdrage vaan Locarno zien 'n collectie aon internationaol verdrage die rizzelteerde oet de Conferentie vaan Locarno, die plaotsvoond vaan 5 bis 16 oktober 1925, te Locarno in 't polletiek-neutraol Zweitserland. 't Geit um 'n reeks aon aofspraoke tösse Duitsland, Belsj, Fraankriek, 't Vereineg Keuninkriek, Italië, Pole en Tsjechoslowakije. Veur 't groetse gedeilte gónge de verdrage euver 't erkènne vaan de landssjraome tösse de deilnömmende len: sjraome die door 't Verdraag vaan Versailles in 1919 waore oontstande. Daoneve oondersjreve de Verdrage de veurbereiing vaan 't touwtreije vaan Duitsland tot de Volkereboond.

In tegestèlling tot 't Verdraag vaan Versailles woorte de Vedrage vaan Locarno weldegelek nao oonderhandelinge mèt Duitsland geteikend. De Locarno-Verdrage woorte meugelek gemaak door de nui linkse regiering vaan Fraankriek, oonder leiing vaan Édouard Herriot, die de ierdere nationalistische regiering vaan Raymond Poincaré in 1924 opvolgde. Ouch waor belaangriek tot vaan de Duitse kant de minister vaan Boetelandse Affaires Gustav Stresemann sinds 1923 aon 't stuur stoond. Heer stoond minder nationalistisch en väöl mie internationaol-realistisch tegeneuver de gevolge vaan 't Verdraag vaan Versailles.

In d'n tied nao de Verdrage woort in de Europese polletiek en media dèks 't bezej Locarno-geis of de geis vaan Locarno gebruuk um 'n bepaolde liberaol-democratische en Euro-federalistische beweging binne Europa te oondersjrieve. Mèt de opkoms vaan 't fascime verloor dees meneer vaan dinke aon populariteit. Nao de Twiede Wereldoorlog en de ierste stappe nao 'n Europese Unie woorte gemaak, kraog dees beweging weer mie aondach.