Zöstere

Dit artikel is gesjreve (of begós) in 't Zösters. Laes hie wie v'r mit de versjillende saorte Limburgs ómgaon.

---

De Sint-Amelbergabasiliek

Zöstere (Nederlands Susteren) is ‘n sjtedje in de Nederlands-Limburgse gemeinte Ech-Zöstere, mit óngevieër 7.400 inwoners. 't Kerngebied haet 'n oppervlak van 28,34 km² en grens aan zoawaal 't Belsj (Mezeik) es 't Pruusjes (de Zelfkantj). Zöstere haet veural 'n woonfunktie.

Zöstere haet eine historische kern mit ein dörps karakter. Dao is 'n èlfde-ieëwse Romaanse kirk gewiet aan de heilige Amelberga. Tiedes de 7-jaorlikse heiligdomsvaart, op 9 september 2007, haet de woordveurder van Paus Benedictus XVI bekènd gemaak, det de kirk verheve wórt tot basiliek. 't Is de 6e basiliek in Limburg en de 21e in Nederland.

De gesjiedenis van Zöstere is pós in de achste ieëw te tracere, toen hie ein benedictiener kloaster gestich wórt. De romaanse kirk woor oorsprónkelik deil van dees abdie. Later wórt dit kloaster ein sjtuf, 'n kloaster veur adellikke vrouwluuj. In 1276 kreeg Zöstere sjtadsrechte. In 2003 wórt Zöstere mit Ech tot de nuuj gemeinte Ech-Zöstere gefuseerd.

De ómgaeving is bosriek.

Aafkómstig oet Zöstere

• De Janse Bagge Bend, 'n Limburgstalige popband
• Nelly van den Boom, kunssjilderes, 1963
• Annie Schreuders-Derks (1943), sjriefster en beheerder museum van de Vrouw en Nostalnu
• Evert Zits (1931-2024), sjriever, maker van beeldjes, ein van de oprichters van de Natuurvrunj en veurmalig regisseur van ‘t sjpel der Heiligdomsvaart (1979, 1986, 1993)