Aw-Kirk

Dit artikel is gesjreve (of begós) in 't Roosters. Laes hie wie v'r mit de versjillende saorte Limburgs ómgaon.

---

De ligking van Aw-Kirk in de gemeinte Ech-Zöstere.

Aw-Kirk (Nederlandjs: Oud-Roosteren) is e gehuch in de gemeinte Ech-Zöstere in Nederlands-Limbörg.

Aw-Kirk waas de oarsjprunkelike kern van 't dörp Roostere. Hie bevónj zich de parochiekirk woavan de sjtichting zeker tót de dertieandjen ieaw trögkgeit.

In 1839 waerdje de kirk aevel aafgebraoke en vervange door de hujige, miea nao 't wèste gelaege Sint-Kuueb de Mieaderekirk. De Kern van Roostere versjoof zich daohaer en 't oarsjprunkelik Roostere waerdje dus Aw-Kirk.

De kirkhaof van de veurmaolige kirk bleef es zoadanig in gebroek en op de plaats van de veurmaolige kirk waerdje in 1870 'n zèsheukige neogotische kepel geboewdj. Deze kirkhaof bezitj nag inkel zevetieandje ieawse graafsjtein.

d'n Aanlègk van 't Julianakanaal (1925-1934) zörgdje d'rveur det Aw-Kirk geïsoleerdj waerdje van de res van Roostere.

Plaetjes

• 
  Twieataolig ingangssjild.
• 
  Kirkhaofkepel.
• 
  Taorekruuts verdwene kirk.
• 
  Aoje graafsjtein.