Sjots hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Sjots hierevoetbalèlftal vertreujt Sjotland op internationaol voetbalmatche. Zjus wie de teams vaan de aander drei Britse deilstaote (constituent countries) Ingeland, Wales en Noord-Ierland weurt ouch 't Sjots voetbalteam es volweerdeg nationaol team gezeen. Sjotland is daorum ouch lid vaan de FIFA en de UEFA. 't Sjots hiere-èlftal is, same mèt 't Ingels, 't ajdste nationaol team op de wereld. Voetbal is in Sjotland al sinds de negentienden iew hendeg populair. Sinds jaor en daag evels zien de prestaties vaan 't team besjeie.

Historie

Tösse 1870 en 1872 woorte get oonofficieel matche tösse teams mèt Ingelse en Sjotse voetballers gespäöld. Op 30 november 1872 kaom 't tot d'n iersten officiëlen interland; de match indegde in 0-0. In de koumende jaore kraoge ouch Wales en Ierland (daan nog deil vaan 't Vereineg Keuninkriek) hun teams. Sjotland späölde dao dèks tege (in 't Home Championship) en won in 't gemein. Pas in 1903 verloor Sjotland veur 't iers vaan 'n aander land es Ingeland, wie Ierland te sterk waor.

In 1929 späölde Sjotte veur 't iers tegen e neet-Brits team: In Bergen woort Noorwege mèt 3-7 geklop. In de koumende jaore späölde de Sjotte mie vaan die matche; ouch die wonne ze in 't gemein, meh 'ne match tege Oosteriek in 1931 woort hun ierste verlees. Competitief speule tege lande boeten 't Gemeinebès waor neet meugelek, umtot de veer Britse naties neet bij de FIFA woorte touwgelaote. Zoedoende oontbraok Sjotland op de WK's vaan 1930, 1934 en 1938.

In 1954 deeg Sjotland veur 't iers aon e WK mèt. Dit woort gei succes: Sjotland kaom neet wijers es de grópsfaas. Dit zouw later 'ne constante weure op WK's en EK's: tot aon 2024 is Sjotland nog noets door de poules gekoume. In de jaore zèsteg lökden 't zelfs gaaroet neet veur nao 't WK te koume. Wel had 't team, oonder traineur Ian McColl, nog dèks succes in 't Home Championship. In de jaore zeventeg kierde Sjotland trök op 't WK, meh ouch noe mèt mer geïsoleerd succes. Zoe wonne ze in de grópsfaas vaan 1978 nog mèt 3-2 vaan Nederland. Wel deeg 't land, tot en mèt 1990, oetindelek vief kier achterein aon e WK mèt. In 1992 volgde ouch 't ierste EK.

Nao nog eine kier, in 1998 op e WK te höbbe gestande braok 'nen tied vaan druugde aon. Sjotland plaotse ziech noets veur de groete indrundes, zelfs neet wie 't EK in 2016 veur 24 len touwgenkelek woort. Tegeliek stortde ouch 't Sjots clubvoetbal in. Critici wete dat dèks aon de cultuur vaan oongezoond ete in 't land, wat tot 'n epidemie vaan euvergewiech had geleid. De druugde indegde in 2021. Ouch noe stoetde 't land neet door nao de knock-outrundes.

Fancultuur

Umtot de voetbalcultuur in Sjotland deep wortelt, weurt 't team trouw door fans bezoch. De supporters vaan Sjotland weure de 'Tartan Army' geneump. Bij matche kleie ze ziech dèks in de traditionele kilt; 'nen doedelzak klink ouch dèks vaan de tribune.

Bij matche weurt es oonofficieel volksleed Flower of Scotland gebruuk.