Ingels hierevoetbalèlftal

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


't Nui Wembleystadion tijdens 'ne match tösse Ingeland en Duitsland.

Ingeland heet es eine vaan de veer Britse deilstaote vaanajds e nationaol voetbalteam. Same mèt 't Sjots voetbalteam, boe Ingeland in 1872 d'n alleriersten interland tege späölde, is 't 't ajdste nationaol èlftal vaan de wereld. 't Weurt, wie de res vaan de 't Ingels voetbal, gereguleerd door de Football Association (FA). De bèste prestatie vaan 't Ingels èlftal is 't behole vaan de Wereldbeker in 1966. Op de Olympische Speule maag Ingeland neet apaart deilnumme; veur zoe'n toernoje besteit e Brits hierevoetbalèlftal.

Historie[bewirk | brón bewèrke]

Al in 1870 woorte wèdstrije tösse selecties vaan Ingelse en Sjotse speulers gespäöld, oonder ospicië vaan de FA. Die rekent me evels nog neet es interland, umtot bei teams door dezelfde boond waore geformeerd. De match Sjotland-Ingeland op 30 november 1872 in 't Sjots Partick waor d'n ierste mèt teams oet twie versjèllende boonde. Dit duel indegde in 0-0. De jaore dao-op späölde ze diverse wèdstrije tege de aander landsdeile vaan 't Vereineg Keuninkriek. In 1906 kaome ze bij de FIFA, en in 1908 oondernaome ze 'ne tournee op 't continent, boe ze de ierste interlands tege neet-Britse teams späölde. Oondertösse waor ouch 'n apaart Ingels amateurèlftal oontstande. E conflik mèt de FIFA, oonder mie euver 't betaole vaan speulers, leide detouw tot Ingeland in 1928 droetstapde en pas in 1946 weer debij kaom. Heidoor misde Ingeland de ierste drei WK's.

Eine kier trök op 't internationaol podium bleek tot de Ingelse neet mie zoe superieur waore wie ieder. In de ierste runde vaan 't WK vaan 1950 verlore ze vaan de Vereinegde Staote, wat hel aonkaom, en in 1953 goonge ze mèt 3-6 (toes) en 7-1 (oet) twie kier oonderoet tege 't Hongarije vaan Puskás. In de jaore zèsteg góng 't beter en in 1966, op 't WK in eige land, lökden 't zelfs um wereldkampioen te weure door in de finaal Wes-Duitsland mèt 4-2 te versloon. Geoff Hurst scoorde heibij 'nen hattrick.

't Succes doort neet laank; in 1974 en 1978 oontbraoke ze weer op 't WK. Get beter góng 't in de jaore tachteg; in 1990, bij 't WK in Italië, haolde ze zelfs de veerde plaots. In sjrèl contras stoont daomèt hun oontbreke op 't volgend WK. In 1996 organiseerde Ingeland 't EK; in de haaf finales lagte ze 't aof tege de latere kampioen Duitsland. Op de WK's vaan 2002 en 2006 haolde ze nog de kwartfinales; sindsdeen is 't Ingels team neet bezunder succesvol mie gewees, oondaanks tot hun clubcompetitie in dezen tied tot de bèste vaan de wereld oetgreujde.