Amerikaons hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Logo vaan d'n Amerikaonse Voetbalboond (USSF)

't Amerikaons hierevoetbalèlftal (Ingels: United States men's national soccer team) vertreujt de Vereinegde Staote in internationaol voetbalmatche. Allewel tot voetbal laank neet de groetste en populairste sport is in 't land, en 't Amerikaons team naovenant neet bij de sterkste vaan de wereld huurt, is 't nog ummer ein vaan de twie groete len vaan de Noord-Amerikaonse fidderatie CONCACAF. Mexico, 't aander sterk land op 't continent, is de groete rivaol.

Historie[bewirk | brón bewèrke]

Al in 1885 woort 'n Amerikaons voetbalèlftal geformeerd, en wel veur 'ne match tege Canada. Deze match, dee in 'n 1-0-wins veur de Canadeze indegde, waor d'n ierste voetbalinterland boeten 't Vereineg Keuninkriek. In 1904 dege twie Amerikaonse teams mèt aon de Olympische Speule in Saint-Louis, zoetot 't land zoewel broons es zèlver pakde. In 1916 speulde veur 't iers 'n èlftal oonder d'n Amerikaanse voetbalboond USSF. De VS won hei-in mèt 3-2 vaan Zwede.

In 't Interbellum begós American football - gebaseerd op rugby, mèt get dujeleke voetbalinvlood - de voetbalsport te euvervleugele. Um verwarring te veurkoume góng me 't voetbal soccer neume (nao association football). Daan nog waor 't èlftal sterk genóg um ziech te plaotse veur de WK's vaan 1930 en 1934 en de Olympische Speule vaan 1936. (Oet 't WK vaan 1938 trokke ze ziech trök.) Euver 't algemein móste ze 't wel aoflègke tege equipes oet Europa en Zuid-Amerika.

Nao d'n Twiede Wereldoorlog plaotsde 't team ziech nog veur 't WK vaan 1950 in Brazilië. Groete verrassing waor de wins tege Ingeland in de grópsfaas; dit is nog ummertouw eine vaan hun groetste stunts. Daan raakde de sport evels gaw in de vergetelheid. Internationaol presteerden 't team wieneg mie, en in de media kraog voetbal koelek de aondach. Umtot Noord-Amerika mer ei team nao 't WK moch sjikke en de prestaties hendeg achterlepe bij die vaan Mexico, maakde 't team ouch noets 'n reëel kans. Neve hoonkbal, baskèt, American football en ieshockey gaof 't veur 't groet pebliek ouch koelek nog plaots veur voetbal. De opriechting, ind jaore zeventeg, vaan de Major League Soccer maakde dao mer beperk 'n ind aon: de groetste stare waore awwer boetelandse speulers.

Wat beter holp waor de koms vaan väöl Latijns-Amerikaonse migrante. Oonder hun leefde de sport zeker wel. Ouch woort voetbal in die jaore oontdèk es e blessure-ermer alternatief veur American football. 't Woort 'ne populaire kindersport, en ouch vrouwlui gónge 't gere doen. 't Amerikaons damesvoetbalèlftal woort al gaw 't bèste vaan de wereld en is dat nog ummer. Dat had ouch ziene weerslaag op 't hierevoetbal. In 1990 plaotsde ziech 't team veur 't iers in 40 jaor weer veur e WK. Sindsdeen heet ziech de VS veur eder WK geplaots, boete dat vaan 2018 in Rusland. De bèste prestatie waore de kwartfinaoles op 't WK vaan 2002. In 1994 organiseerde 't land zelf 't Wereldkampioensjap. In 2026 kump 't WK trök; daan organisere de VS 't same mèt Mexico en Canada.