Zweeds hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Zweeds hierevoetbalèlftal späölt veur Zwede op internationaol voetbalmatche. De prestaties höbbe door de jaore heer gewisseld, meh gelèt op zie klein aontal inwoeners is Zwede e zier succesvol voetballand. De groetste successe woorte behaold op de Wereldkampioensjappe. 't Zweeds voetbal weurt gereguleerd door de Svenska Fotbollförbundet (SvFF).

Historie[bewirk | brón bewèrke]

't Zweeds team wat in 1958 twiede woort, veur 't begin vaan de finaal tege Brazilië.

't Èlftal vaan Zwede woort in 1908 veur 't iers opgestèld. D'n ierste match waor tege Noorwege en woort mèt 11-3 gewonne. Op de Olympische Speule in Londe later dat jaor waor Zwede neet zoe succesvol: 't verloor mèt 12-1 vaan Groet-Brittannië. Veer jaor later, wie de Speule in eige land waore, góng 't al neet beter. Pas bij de Speule vaan 1924 (in Paries) haolde ze 'n broonze medaje. Oetindelek wis Zwede in 1948 (Londe) wel goud te hole en in 1952 (in Helsinki) nog ins broons. In deen tied begóste ze Denemarke, tot daan touw 't bèste Scandinavisch voetballand, ummer mie te euvervleugele.

In 1934 deeg Zwede veur 't iers mèt aon 't WK. Hun ierste succes in dit toernooj waor 'n daarde plaots in 1950. In 1958 waor 't WK in Zwede zelf. Hei verpópzakde ze de ganse wereld door in de haaf finaal Wes-Duitsland te versloon. Oetindelek waor Brazilië, mèt oonder mie de joonge Pelé, väöls te sterk (5-2).

Nao 1958 lepe de prestaties trök. In de jaore zèsteg wiste de Zwede ziech neet veur WK's te plaotse, in de jaore zeventeg kaom 't (mèt oetzundering vaan 1974) dèks neet door de grópsfaas. Ouch in de jaore tachteg presteerde 't team wieneg. 't Europees kampioensjap bleef evegood boete bereik. In 1992 waor 't EK evels in eige land. Hei wis Zwede de haaf finale te hole. Op 't WK vaan 1994 kraog dit e vervolg, wie Zwede de daarde plaots haole (nao e verlees tege Brazilië en wins op Bulgarije). Dit succes had Zwede veural te daanke aon 'ne good scorenden aonval: neet minder es 15 gole scoorde ze door 't toernooj heer.

Dit succes heet Zwede neet mie kinne herhole. Op diverse WK's waore ze aofwezeg, en dèks kaome ze neet wijer es de achste finales.