Deens hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Parken, 't nationaol stadion vaan 't Deens hierevoetbalèlftal in Kopenhage.

't Deens hierevoetbalèlftal vertrejt Denemarke bij internationaol voetbalmatche. 't Team weurt gereguleerd door de Dansk Boldspil-Union (DBU). Denemarke heet sinds de opriechting vaan zie team rillatief constant gepresteerd, al plaotsde 't ziech neet ummer veur groete toernoje. Väöl Deense internationals höbbe door de jaore heer bij Nederlandse clubs gespäöld.

Historie[bewirk | brón bewèrke]

Denemarke späölde zienen iersten officiële match op de Olympische Speule vaan 1908, in Londe. De Dene begóste 't toernooj direk mèt twie moonsterwinste op Fraankriek en haolde oetindelek zèlver. Dit succes zouwe ze veer jaor later in Stockholm herhole. In de decennia die volgde góng 't neet zoe good. Voetbal bleef langen tied (op las vaan de DBU) 'n amateurzaak, en de boond leet 't èlftal ouch neet voetballe tege groete tegestanders. In plaots daovaan späölde 't vaan 1920 allein mèt de aander Scandinavische len um 't Noords Kampioensjap. Nao d'n Oorlog traoje ze wel weer aon; in 1948 (Londe) haolde 't team broons, in 1960 (Roeme) zelfs zèlver. 'n Aander huugdepunt waor de kwalificatie veur 't EK vaan 1964 (boe toen nog mer veer len aon mètdege). 't WK bleef evels boete bereik.

Pas in 1971 lufde de DBU 't verbod op profvoetbal op. 't Zouw nog eve dore ietot de effekte daovaan ziechbaar woorte, meh in de jaore 1980 stoont daan toch de ierste groete generatie Deens voetballers op. Groetste maan oonder hun waor Morten Olsen, dee later ouch trainer zouw weure. In 1986 plaotsde de Dene ziech veur 't iers veur e Wereldkampioensjap; ze haolde de achste finaal. 't WK vaan 1990 woort neet gehaold. Veur 't EK vaan 1992 kwalificeerde Denemarke ziech iers ouch neet, meh naotot Joegoslavië door d'n intösse oetgebroke börgeroorloge woort oetgeslote kóste de Dene hun plaots innumme. Nao twie partije in de grópsfaas leke de Dene oetgesjakeld, meh ze gónge door en wiste 't toernooj te winne.

De prestaties daonao waore get wisselend. 't WK vaan 1994 woort neet gehaold en de EK's vaan 1996 en 2000 vele tege. Op 't WK vaan 1998 wis 't team daan weer de kwartfinale te hole. Wel waor nao 2000 dudelek tot 't èlftal mós verjoonge, Heivoor woort Morten Olsen es coach aongestèld. Mèt staarspeulers wie Jesper Grønkjær en Dennis Rommedahl (allebei in Nederland bekind) woort Denemarke 'ne stabiele speuler in d'n Europese subtop. Pas naotot 't Olsen neet lökde um Denemarke nao 't WK vaan 2014 en 't EK vaan 2016 te leie, woort heer vervaange. De nuie coach, Åge Hareide, wis 't Deens team nao 't WK vaan 2018 te sjikke. Denemarke brach 't hei tot de achste finaal.

Begin september 2018 leep e financieel conflik tösse de bond en de speulers hoeg op. De speulers weigerde aon te trejje veur 'nen oefenmatch tege Slowakije. Umtot Denemarke zwoer sancties te wachte stoonte es ze de matche neet zouwe speule, stèlde de bond e team op vaan zaolvoetballers en speulers oet de lieger devisies. Dit team verloor mèt 3-0. Kort daonao woort 't conflik opgelos.

Denemarke waor ouch weer presint op 't EK vaan 2021. De match mèt de mieste aondach waor die tege Finland, gespäöld in 't eige Kopenhage. In de ierste hèlf veel Christian Eriksen hei veur doed neer mèt 'nen hartstèlstand; naotot heer waor gereanimeerd en in d'n hospitaol weer bij kinnes waor, späölde me de match oet. Denemarke haolde oetindelek de haaf finales. Op 't WK vaan 2022 in Qatar góng 't väöl minder good: mèt ei punt oet drei matche en mer eine gool gescoord góng Denemarke kansloes in de poulefase droet.