Wereldkampioensjap hierevoetbal 2026

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Wereldkampioensjap hierevoetbal 2026 weurt 't 23e WK hierevoetbal. 't Weurt georganiseerd door de FIFA en geit in juni en juli vaan dat jaor weure gehawwe in Canada, de Vereinegde Staote en Mexico; daomèt weurt 't d'n ierste kier tot drei len 't WK organisere. Mexico heet 't WK twie kier iejer allein georganiseerd, in 1970 en 1986; de VS dege dat in 1994. 't Is ouch veur 't iers tot op 't WK 48 len speule; vaan 1998 tot en mèt 2022 waore dat 'rs 32. Veur dit WK zien neet minder es 16 stadions nujeg.

Verkezing

De stumming veur de gashier(e) vaan 't WK 2026. De kandidaote zelf, die neet mochte stumme, zien in 't geel (Noord-Amerikaonse combinatie) en mauve (Marokko). Broenechteg gries zien de stumme veur 't combinatiebod, blauw die veur Marokko. Greun stumde tege allebei, roej len oonthele ziech. Liechgrijs len zien gei FIFA-lid.

Op 13 juni 2018 woort gestump veur de locatie vaan 't WK. De UEFA (Europa) en de AFC (Azië) kóste geine goej nao 't WK doen, umtot de veurege twie WK's al in die confidderaties zouwe koume (2018 in Rusland, 2022 in Qatar). Zouw de noed aon de maan koume, daan kós de UEFA wel invalle. Oetindelek woorte veur 't zwoer program vaan 48 len en 80 matche mer twie bode gedoon. 't Eint kaom vaan Marokko, 't aandert vaan Canada, de VS en Mexico.

Veur 't iers woort noe gestump volgens de nui regele. Bij de stumrunde vaan december 2010, boebij de WK's vaan 2018 en 2022 waore touwgeweze, waor hendeg väöl kritiek gekoume. Väöl lui voonte tot allein veur 't groet geld waor gekoze en besjöldeginge vaan umkouping waore neet vaan de loch. Daorum kós noe eder FIFA-lid, boete de kandidaote daan, euver de kandidature stumme. Daobij woorte de stumme nao aofluip opebaar gemaak, zoetot eventueel umkouping neet kós weure touwgedèk. Ouch woort de minserechtesituatie expliciet oonderzoch. Oetindelek won 't gecombineerd bod gemekelek mèt 134 stumme tege 65 veur Marokko. Drei len oonthele ziech, eint stumde expliciet veur 'gein vaan twie'.

Euver 't algemein waore lui wel te spreke euver 't Noord-Amerikaons bod, umtot 't financieel en logistiek väöl beter inein zaot. Me waor evels wel engsteg um de streng immigratieregels die de regering-Trump had veurgestèld. 't Waor neet dujelek of voetbalteams oet moslimlen 't land wel in kóste reize. Oetindelek deeg Trump persoenelek wete tot teams bij de reis nao de VS niks in de weeg zouw weure gelag. In 2020 verloor Trump daobij de verkezinge vaan d'n Democraot Joe Biden, zoetot de kwestie veurluipeg neet aon de orde is.

Kwalificatie

Vaan teväöre waor gedeuns euver de vraog of de drei len ziech wel allemaol otomatisch veur 't WK móste kwalificere. Euver 't algemein woort gezag tot me dat toch zouw doen; mèt 48 teams in plaots vaan 32 waor dao ouch mie plaots veur. Zoedoende zouwe Canada, de Vereinegde Staote en Mexico alle drei geplaots zien veur de indrunde. Dit is nog neet formeel bevesteg.

De verdeelsleutel weurt noe es volg:

Fidderatie	Pl. (2026)	Pl. (2022)
AFC (Azië)	8 1/3	4 1/2 (+1)
CAF (Afrika)	9 1/3	5
CONCACAF (Noord-Amerika)	6 1/3 (+1/3)	3 1/2
CONMEBOL (Zuid-Amerika)	6 1/3	4 1/2
OFC (Oceanië)	1 1/3	1/2
UEFA (Europa)	16	13

Daarde plaotse zien play-offplaotse boe in 'n intercontinentaol toernooj um gevoetbald geit weure. Alle confidderaties boete de UEFA kriege ein zoe'n plaots; de zèsde geit daan nao de confidderatie die 't toernooj hèlt.

Stadions

Zèstien stadions zien aon 't WK touwgeweze: twie in Canada, èlf in de VS en drei in Mexico.

Späölstad	Stadion	Capaciteit	Pleetsje
Atlanta (GA)	Mercedes-Benz-Stadium	71.000
Boston (MA)	Gilette Stadium	65.878
Dallas (TX)	AT&T Stadium	80.000
East Rutherford (NJ)	MetLife Stadium	82.500
Guadalajara (JAL)	Estadio Akron	49.850
Houston (TX)	NRGN Stadium	72.220
Kansas City (KS)	Arrowhead Stadium	76.416
Los Angeles (CA)	SoFi Stadium	70.240
Mexico-stad	Estádio Azteca	87.523
Miami (FL)	Hard Rock Stadium	64.767
Monterrey (NLE)	Estadio BBVA	53.500
Philadelphia (PA)	Lincoln Financial Field	69.796
Santa Clara (CA)	Levi's Stadium	68.500
Seattle (WA)	Lumen Field	79.000
Toronto (ON)	BMO Field	45.500
Vancouver (BC)	BC Place	54.500

Grópsfaas

Me heet twie veurstèlle gedoon veur de grópsfaas. In 't eint zouwe de 48 teams in 16 poules vaan drei weure verdeild, in 't aandert zouw weure gewèrk mèt 12 poules vaan veer. In allebei de gevalle zouwe daan 32 teams nao de zèstiende finaal doorstruime.

E sterk bezwoer tege poules vaan drei is de meugelekheid op salonremises. Naotot dit op 't WK vaan 1982 waor gebeurd, besloot me de lèste grópsmatche ummer synchroon te speule; noe zouw dat neet mie kinne. Daobij zouwe, wienie twie teams tegenein speule en e daarde kinne oetsjakele, de ganse poule in dat lèste speul kinne weure beslis. 'n Oplossing is veur gelieke speule te verbeje wienie nujeg mèt penanties 'ne winner te bepaole. Um de ganse controverse die dit gief is nog gei formaot bepaold.