Oosterieks hierevoetbalèlftal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Oosterieks hierevoetbalèlftal vertreujt Oosteriek in internationaol voetbalmatche. 't Team oontstoont in 1902 es eint vaan de ierste landeteams op 't Europees vasteland en had jaorelaank oongekind succes. Ouch nao d'n Twiede Wereldoorlog bleef 't 'nen tied laank succesvol. Sinds de jaore tachteg heet 't land evels geine groeten indrök mie kinne make.

Historie[bewirk | brón bewèrke]

't Ernst-Happel-Stadion (veur 1992: Praterstadion) in Wene, boe Oosteriek dèks zien toesmatche späölt.
Ernst Happel, kort nao d'n Oorlog staarspeuler vaan Oosteriek en later nog boondscoach.

Oosteriek späölde zienen ierste match op 12 oktober 1902, tege Hongarije. De twie len (daan riekshèlfte vaan de Donaumonarchie) zouwe nog talloes kiere tegenein speule; nao Argentinië-Uruguay is dit de miesgespäölde voetbalinterland. In 1904 woort d'n Oosteriekse voetbalboond ÖFB opgeriech. Oondaanks ziene goje start waor 't èlftal nog neet opgewasse tege Ingeland: in 1908 verloor 't dao mèt 'n dudeleke 1-11 vaan. In 1912 traoj 't èlftal aon op de Olympische Speule vaan Stockholm. Oosteriek begós good mèt 'n 5-1 wins op Duitsland, meh woort in de kwartfinaal mèt 3-1 oetgesjakeld door Nederland.

D'n echte gouwen tied braok aon in de jaore daarteg. In 1931 wis Oosteriek, es ierste team vaan 't Europees vasteland, vaan Sjotland te winne. Op 't Wereldkampioensjap vaan 1934 ('t ierste boe Oosteriek ziech veur insjreef) woort de veerde plaots behaold, bij de Olympische Speule vaan 1936 in Berlijn zelfs de zèlvere medaje (2-1 tege Italië nao verlènging). Ouch veur 't WK vaan 1938 had Oosteriek ziech geplaots, meh d'n Anschluss maakde 'n ind aon 't bestoon vaan 't Oosterieks team. In theorie hej 't vereineg Duits team 't sterkste vaan de ganse wereld kinne weure, meh de vereineging kaom te vreug um dao e good team vaan te make.

Nao 't ind vaan d'n Twiede Wereldoorlog woort al gaw weer 'n Oosterieks èlftal geformeerd; al in augustus 1945 späölde dit team twie kier tege Hongarije. Aanders es Duitsland moch Oosteriek wel mètdoen aon 't WK vaan 1950; 't land trok ziech evels vreugtijeg trök. In 1954, bij 't WK in Zwitserland, haolde 't land de daarde plaots (nao verlees vaan Duitsland en wins op Uruguay). Veer jaor later waor Oosteriek neet zoe succesvol, en in 1962 trok 't ziech obbenuits trök. In 1965 wis Oosteriek op Wembley te winne vaan Ingeland; 't waor pas 't daarde team vaan 't Europees vasteland wat dat lökde. Toch haolde Oosteriek 't WK vaan 't jaor dao-op neet. Dat lökde pas weer in 1978, wie 't land tot de kwartfinales kaom. Oosteriek baorde in de grópsfaas opzien door de regerende wereldkampioen Duitsland mèt 3-2 te versloon (en ze zoe oet te sjakele), 'ne match bekind es 't 'Woonder vaan Córdoba'. In 1982 troffe Oosteriek en Duitsland ziech obbenuits in de poule. Noe beslote ze nao tien menute tot 'n salonwins vaan 1-0 veur Duitsland, boebij allebei de len zouwe doorgoon. Deze match steit bekind es de 'Sjan vaan Gijón' en waor direkte aonleiing um de lèste späöldaag vaan poules op groete toernoje in 't vervolg synchroon te speule.

Nao 1982 wis 't Oosterieks team ziech nog twie kier (in 1990 en in 1998) veur e WK te kwalificere, zoonder evels op te valle. In 2008 organiseerde Oosteriek, same mèt Zwitserland, 't Europees kampioensjap hierevoetbal; 't team waor heidoor otomatisch geplaots en deeg zoe veur d'n ierste kier mèt aon 'n EK. Veur 't EK vaan 2016 plaotsde 't team ziech op eige krach.