Argentijns hierevoetbalèlftal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Argentijns hierevoetbalèlftal vertrejt Argentinië in interlandvoetbalmatche. 't Èlftal weurt, wie gans 't Argentijns voetbal, gereguleerd door de Asociación del Fútbol Argentino (AFA), die is aongeslote bij de CONMEBOL. Argentinië is eint vaan de succesvolste voetballen in Zuid-Amerika en op de wereld tout court. Groete rivaole zien Brazilië, Uruguay, Duitsland en Ingeland. Bijnaom vaan 't team is Los Albicelestes ('de wit-leechblauwe').

Historie[bewirk | brón bewèrke]

't Argentijns èlftal in 1958, veur 'ne match tege Wes-Duitsland.

Voetbal kaom al ind negentienden iew nao Argentinië euvergewejd, wie Ingelse speulers de sport kaome demonstrere. Al op 16 mei 1901 stoonte Argentinië en Uruguay in Montevideo tegeneuverein; Argentinië won de match mèt 2-3. In de jaore die volgde opereerden 't team, wie gans 't Zuid-Amerikaans voetbal, in rillatief isolatie en späölden Argentinië allein vrundsjappeleke matche tege aander Zuid-Amerikaanse ploge. Vaanaof 1916 (de ierste editie, in eige land) deeg 't ouch aon 't Zuid-Amerikaans voetbalkampioensjap mèt, boe 't dèks hoeg indegde en in 1921 (ouch in eige land) veur 't iers kampioen vaan woort. Argentinië is in dit toernooj en in d'n opvolger de Copa América hendeg succesvol gewore: tot nog touw (2018) höbbe ze al veertien kier gewonne, veur 't lèts in 1993. In 1928 stoont Argentinië in Amsterdam veur 't iers op de Olympische Speule; dao haolden 't direk de zèlvere medaje. Ouch op 't ierste Wereldkampioensjap vaan 1930 waor 't èlftal presint, en ouch hei woort 't twiede.

De volgende decennia zat 't nationaol èlftal gein bezunder prestaties neer. Veur 't WK sjreef 't land ziech soms neet ins in, en de jaore tot ze dat wel dege woorte ze dèks al vreug oetgesjakeld. Argentinië waor evels weer gans trök in 1978, wie 't WK in eige land woort gehawwe. Dees prestatie zouw 't team in 1986 herhole, noe mèt de joonge Diego Maradona es staarspeuler. Ouch in 1990 presteerde 't team good, meh Maradona waor oet vörm en 't Argentijns team bloonk negatief oet mèt groof en extreem verdeidegend speul. Oetindelek woort de finaal vaan Wes-Duitsland verlore. E wijer succeske kaom in 1992, wie de club de allerierste Keuning Fahdbeker (de later Confederations Cup) won.

De jaore dao-op raakde 't land zien internationaol favorieterol weer kwiet. Zelfs in de Copa América wis 't land neet mie oet te blinke. Wel won 't èlftal in 2004 veur 't iers goud op de Olympische Speule, 'n prestatie die e jaor later woort herhaold. De koms vaan staarspeuler Lionel Messi, eine vaan de bèste voetballers vaan de jaore 2010, brach 't land weer get succes. Toch veel Messi, dee bij FC Barcelona oetgreujde tot de bèste voetballer vaan de wereld, bij zie toesland tege. Es 't land wied kaom, waor dat miestens door sterk verdeidegend speul; de groete staar kós door zien minder teamgenoete neet in stèlling weure gebrach. 't Bèste rizzeltaot waor 'n twiede plaots op 't WK vaan 2014.