Diego Maradona

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Maradona in 2012.

Diego Armando Maradona Franco (Lanús, 30 oktober 1960 - Tigre, 25 november 2020) waor 'nen Argentijnse voetballer en traineur, dee algemein weurt gezeen es eine vaan de groetste voetballers oets. Heer späölde es centraolen aonvallende middevelder (speulverdeiler); op die positie had heer de mach um zelfs e minder team tot groete huugde te verluffe. Bijnaome waore Pelusa ('flöjske') en El Pibe de oro ('de joonk vaan goud').

Maradona greujde op in 'nen erme volkswiek in Lanús, 'n veurstad vaan Buenos Aires. In de jäög späölde heer bij Argentinos Juniors, boe heer tot 1981 bleef voetballe en astrein al oetbloonk en väöl scoorde. Nao nog e jaor te höbbe gespäöld bij Boca Juniors, ziene favoriete club, góng heer in 1982 veur e recordbedraag nao FC Barcelona. Twie jaor later woort dat record alweer verbroke wie S.S.C. Napoli häöm euverkoch. Bij Napels zouw heer zeve jaor speule; de club zouw in deen tied twie kier kampioen vaan Italië weure (in 1987 en in 1990). 't Huugdepunt vaan zien carrière waor 't WK vaan 1986 in Mexico, boeop heer mèt 't nationaol èlftal wereldkampioen woort. Dees prestatie woort gooddeils aon zien individueel klasse touwgesjreve; me rappeleert ziech veural de 2-0 tegen Ingeland, dee de historie ingóng es 'gool vaan d'n iew'. Veer jaor later waor heer oet vörm, al haolde Argentinië nog wel de finaal.

Nao 1990 góng 't mèt zien carrièr snel achteroet. Zien cocaïneverslaving, die heer al jaore had, góng opspeule, en op 't WK vaan 1994 woort heer mèt dopaasj gezeen. Nao de dropvolgende sjorsing späölde heer noets mie veur 't nationaol team. Zien clubcarrièr beïndegde heer in 1997 bij Boca Juniors. In de jaore drop perbeerde heer 't es traineur bij versjèllende clubs, mèt maoteg succes. Daobij oontwikkelde heer irnsteg euvergewiech. Ouch 'ne comeback es traineur bij 't nationaol èlftal, vaan 2008 tot 2010, waor neet zoe succesvol. Wijer kaom heer dèks in 't nuits mèt sjendaole en mèt zien extreemlinkse sympathieë.

Maradona kraog ind 2020 mèt irnstege gezoondheidsprobleme te make. Naotot heer begin november mèt succes 'n hersenoperatie had oondergaange, storf heer later dee maond esnog aon 'nen hartstèlstand. Bij zienen doed kundegde d'n Argentijnse president Alberto Fernández drei daog vaan nationaole rouw aof.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Diego_Maradona&oldid=447082"