Buenos Aires

Van Wikipedia
Gank nao: navigatie, zeuke

Dit artikel is gesjreve in 't Sint-Joasters. 't Weurt gewaardeerd óm in dit artikel 't Sint-Joasters aan te hauwe of aan te gaeve welk anger dialek gebroek is.


De hoagtepuntje van Buenos Aires.

Buenos Aires (Spaans veur "gooj lóchte" of "gunstige winj") is de houfsjtad van Argentinië en ouch 't ikkenomisch en cultureel centrum van det landj. Mit 2,8 miljoen inweuners in 2001 is 't de grótste stad van 't landj. In de agglomeratie Groat-Buenos Aires, ligkendj aan de munjing van de Rio de la Plata (Spaans veur "reveer van 't zilver") woane mièr es 12 miljoen luuj. Aangezeen Groat-Buenos Aires bao e derdje van de Argentiense bevölking hoesves euverhièrsj 't mit zien ikkenomie de res van 't landj.

Buenos Aires ligk aan de ziè en haet 'nen have. De stad wuèrtj aan de landjskantj gans ómslaote door de pervincie Buenos Aires, mer maak zelf gein deil oet van die pervincie. Buenos Aires is e fidderaol distrik en vèltj boete de pervinciaal indeiling van Argentinië.

Dankzie zien talloeaze winkels en boetieks, zien arsjitektuur, zie cultureel laeve, restaurants en zien kosmopolitische bevölking van euverwaegendj Italiaanse, Spaanse, Franse, Duutsje, Ingelse, Oas-Europese, Arabische en Aziatische aafkóms steit Buenos Aires ouch bekandj es 't Peries van 't zuje, allewel 't door väöl ikkenomische perbleme väöl van zien vreuger grandäör haet verlaore. De stad is ein vanne Europeeste van Zuud-Amerika en van 't gans zujelik halfróndj. Oatj kós ze mit häör naordelike taengespelers straeve. De stad belaefdje ziene góljen tied tösse 1880 en 1920, doe Argentinië toet de tièn welvarendjste lenjer van de waereld behoort en Buenos Aires nuujkómmers oet Europa lokdje die hie e baeter bestaon verzóchte te vinje.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Buenos_Aires&oldid=409228"