Uruguayaans hierevoetbalèlftal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Uruguayaans hierevoetbalèlftal, bijgenaomp La Celeste, vertrejt Uruguay in internationaol voetbalmatche. De gloriedaog vaan 't èlftal waore veur en kort nao d'n Twiede Wereldoorlog, meh ouch in d'n einentwintegsten iew heet 't land ziech nao d'n top vaan 't Zuid-Amerikaans voetbal kinne opwèrke. Mèt zien good drei mieljoen inwoeners is Uruguay wiedoet 't kleinste land wat oets wereldkampioen voetbal woort.

Historie[bewirk | brón bewèrke]

't Uruguayaans team wat in 1930 't ierste WK voetbal won.
Luis Suárez, staarspeuler vaan Uruguay in de jaore 2010.

Wie in Argentinië woort ouch in Uruguay ind negentienden iew 't voetbal door roondreizende Britse teams ingeveurd. Op 16 mei 1901 späölde veur 't iers 'n Uruguayaans team tegen 'n aander land: in de eige hoofstad Montevideo góng de match tegen Argentinië mèt 2-3 verlore. De FIFA erkint deze match evels neet, umtot heer neet door d'n Uruguayaanse boond AUF meh door de Ingelse club Albion FC woort gespäöld. D'n iersten officiëlen interland waor op 20 juli 1902, ouch toes tegen Argentinië. Hei woort 't 0-6, ummer nog 't groetste verlees wat 't team oets heet gelijd.

De ierste jaore späölde Uruguay allein tegen Argentinië. Pas in 1916, op 't alleriers Zuid-Amerikaans kampioensjap, späölde ze tege aander teams. Dit toernooj wiste ze te winne, zoe good wie 't kampioensjap e jaor later. In 1919 woorte ze zjus twiede, nao in verlenging door Brazilië te zien verslaoge.

Zoe meugelek maakde Uruguay wie 't in 1924, es ierste Zuid-Amerikaans voetbalteam oets, nao de Olympische Speule aofreisde. Dao in Paries verrasde ze de fysiek speulende Europese teams mèt hun wendbaar, technisch speul en wonne ze 't toernooj. Ouch in 1928, in Amsterdam, pakde ze de gouwe medaje. 't Ierste Wereldkampioensjap hierevoetbal, in 1930, woort in eige land gehawwe. Ouch dit kampioensjap wiste ze te winne. In 1934 en 1938 dege ze oet protes neet mèt, iers umtot diverse Europese len in 1930 neet nao Uruguay gekoume waore, daan umtot de FIFA tege 'n ieder aofspraok in 't toernooj neet tösse Europa en Zuid-Amerika leet wissele meh twie kier achterein in Europa heel.

Bij 't WK vaan 1950, in Brazilië, waor de status vaan 't Uruguayaans èlftal neet mie zoe oonbetwis. 't Waor daan ouch 'n groete verrassing wie ze dat jaor obbenuits wereldkampioen woorte. Dit rizzeltaot haolde ze oonder mie door 'n 2-3 wins op 't gasland. 't Verlees kaom veur Brazilië zoe oonverwachs tot 't e nationaol voetbaltrauma woort, bekind es de Maracanazo (nao 't Maracanãstadion in Rio de Janeiro, boe de match woort gespäöld). Ouch in 1954 dege ze 't nog good mèt 'n veerde plaots.

Daonao góng 't evels wisselend. In 1956 woorte ze nog kampioen vaan Zuid-Amerika, meh in 1958 haolde ze 't WK zelfs neet. De decennia die volgde haolde Uruguay dèks de WK's wel, meh mèt oetzundering vaan 'n veerde plaots in 1970 zatte ze gein oetzunderleke prestaties neer. In 't Zuid-Amerikaans kampioensjap, sinds 1975 es Copa América bekind, góng 't euver 't algemein wel beter: die wiste ze nog diverse kiere te pakke.

D'n ummekier kaom vaanaof 2010. 'n Nui generatie staarspeulers stoont op, oonder wee Edinson Cavani, Diego Forlán en Luis Suárez, dee ouch in Nederland späölde en bij FC Barcelona tot wereldstaar oetgreujde. Op 't WK vaan 2010 woort Uruguay zeker ouch daankzij hun veerde, 't bèste rizzeltaot in 40 jaor.