Rhein-Sieg-Kreis

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Rhein-Sieg-Kreis is 'ne krink (Kreis) in 't zuie vaan Noordrien-Wesfale (Duitsland) en umrink es 't woere de stad Bonn. Zie is weer 'n krinkloos stad en vèlt dus neet oonder dizze krink. Wie me kin hure, heet de krink ziene naom te daanke aon twie reviere die hei door heer struime: de Rien en de Sieg. 't Rienlands distrik vaan Rhein-Sieg ligk in 't Regierungsbezirk Köln, de hoofplaots (de stad mèt de Verwaltungssitz) is Siegburg. Behurende tot eine vaan de 31 kring in Noordrien-Wesfale (de 23 stei zoonder krink weure neet mètgetèld), gief 't hei 'n oppervlak vaan 1.153,2 km², 'n inwoenertal vaan 582.280 en 'n bevolkingsdeechte vaan 505 de veerkante km (volgens de census op 13 dec 2013).

Edere Noordriens-Wesfaalse krink weurt geregeerd door 'ne landraod (Landrat) in de hoofplaots. In Rhein-Sieg-Kreis weurt 'n dialek gesproke dat typerend veur de regio is, naomelek in de euvergaank vaan 't Ripuarisch (boe Kèrkraojs en Kölsj ouch oonder valle) en 't Mozelfrankisch (boe 't Luxembörgs 'n gestandaardizeerde versie vaan is). Puur taolkóndeg gezeen geit 't hei nog um e Ripuarisch dialek, umtot in de taolkónde 't versjèl tösse Ripuarisch en Mozelfrankisch weurt gemaak door de dorp(dörp)/dorf(dörf)-linie. De dialekte vaan dizze krink valle nog zjus bove de linie (hei weurt nog vaan "dörp" in plaots vaan "dörf" gesproke), mer wijer is de vocabulair hendeg Mozelfrankisch; zoetot iemes oet 't Mozelfrankische Bonn ziech verstaonbaarder kin make es 'ne Ripuaar oet Kölle. Wel zien zoewel Ripuarisch es Moezelfrankisch Middelfrankische streektaole.

De in 1815 opgeriechte Kreis maak sinds zien opriechting al 'n forse steiging mèt, veural umtot 't zoe kortbij de aw Duuts hoofstad ligk. In 1970 gaof 't hei nog mer 376.800 lui.

Stei Gemeintes
  1. Bad Honnef
  2. Bornheim
  3. Hennef
  4. Königswinter
  5. Lohmar
  6. Meckem
  7. Niederkassel
  8. Rheinbach
  9. Sankt Augustin
  10. Siegburg
  11. Troisdorf
  1. Alfter
  2. Eitorf
  3. Much
  4. Neunkirchen-Seelscheid
  5. Ruppichteroth
  6. Swisttal
  7. Wachtberg
  8. Windeck
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Rhein-Sieg-Kreis&oldid=405329"