Raotem

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Meersjes, es te dit dialek sjpriks.

---

Raotem (Nederlands: Rothem) ies e dörp in de gemeinte Meersje in Nederlands-Limburg. De naam ies 'n samesjtèlling van rot en heim, dat bewoning op 'n geroojde plek beteikent. 't Dörp woort veur 't ièrsj sjrieftelik vermeld in 'n akte oet 1381. Allewiel wone d'r 1725 luuj.

Bezeenswaerdig

In de jaore 50 zint op 'ne heuvel achter de Holsjtraot, 't zoa geneumde Krekelveldsje, graver van Frankische oarsjpróng gevonge. 't Betreffe 38 Merovingische graver oet 500 tot 750 nao Chr.

Kèrk van 't Heilig Hart van Jezus in Raotem

De kèrk van Raotem, die gewiejd ies aan 't Heilig Hart van Jezus, woort in 1929 geboewd. Ze ies óntworpe door Jos Wielders. In de kèrk hink ein viefluuk van de kunstenaer Pieke Dassen en dao sjtoon beelde van Jean Weerts en Charles Vos. Veur de kèrk sjteit e beeld van de heilige Theresia, dat gemaak ies door Mari Andriessen.

Op de Geul bevingk ziech de Raotemer watermeule oet 1773(?), die functioneerde es olie- en maelmeule. In de jaore vieftig ies gesjtop mèt male en toen ies de meule verboewd tot appartementecomplex. De meuletak van de Geul sjteit in verbinging mèt grachte en vieversj van kesjtièl Vaeshartelt.
Aan 'ne zietak van de Geul, 't Gäölke, bevingk ziech de mergele haof Bisschof. In de tuupgevel sjteit 't jaortal 1728. Ein van de sjure haet sjpeklaoge.

Effe boete 't plaatsnaambord Rothem sjteit 't Hoes Kruisdonk op 'n plek woa ièwelank de kruusmeule van de proosdie van Meersje haet gesjtange. 't Geboew ies opgetrokke in opdrach van fabrikant Louis Regout in 1880 in eclectische sjtiel.
Ten zuud-oaste van Raotem liek 't natuurgebeed De Delle.

Dörpsvereiniginge

• Rothems Harmonie
• SJWR (Jeugwerk)
• St Cecilia ('t Raotems zangkwar)