Brómmele (Wienesrao)

Dit artikel is gesjreve (of begós) in 't Wienesraos. Laes hie wie v'r mit de versjillende saorte Limburgs ómgaon.

---

Weëgkruts aan 'n moer i Brómmele.

Brómmele is 'n buurtsjap va Wienesrao in de gemeënte Baekdale. 't Lik aan d'r zelfde weëg es 't gehuch Zjwier en de buurt Muuëleveld. 't Besjteët oet óngevier 15 hoeëzer. E Gedeilte va Brómmele wuurt 't Muuëleveld genump.

Aan d'r weëg naoë Gewuuëstraoë kik 'n groeëte carréboerderie, d'r Brómmelerhaoëf (1884 en 1965), oet uuëver de velder. Aan de Siep, 'n ziebeëkske aan de Geleënbeëk, sjteet De Brommeldermuuële, 'n vuurmalige kaoëremuuële, die in d'r 15e ieëw al genump wuurt. Gedeëltelik in vakwerk. Aan d'r uuëverkant bevingk zich de Leopoldshaoëf. In 'n wei ligke de reste van 'ne oeërlogsbunker. Op de viersjprunk sjteet e hoes oet 1905 mèt 'n gesjmeëd ieëzere kruts op de moer. 't Is geboewd door 'ne Royen, dae d'r café, keëgelbaan, danszaal, sjmeëderie, mèlkhandel en taxibedrieëf i heel. In 1771 sjteët 't veldkruts op deëze viersjprunk tösje Geweustrao en Hèllebrook, Zjwier en Gebrook op de Kabinetskaat va de Oeësteriekse Nederlande aagegeëve es 'n calvarie.

Muuëleveld

De hoeëzer va ge-Muuëleveld ligke, in lintbeboewing, aan d'r weëg tösje Zjwier en Brómmele tösje-n 't Raoëderveld en 't Gewuuëstraoëderveld. De naam kump van de ligking i ge veld bie de vuurmalige kaoëremuuële op de Geleënbeëk. D'r ouwe muuëleweëg löp lieëger langs de Beëssebëek, die i Brómmele in de Geleënbeëk zal sjtruime.