Iberië

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Iberië of 't Iberisch Sjiereilandj (neet te verwarre mit 't Keuninkriek Iberië oete aadheid det in Kaukasië loog) is 't deil van Europa t'n zuje vanne Pyreneeje. 't Is e sjiereilandj det wuuert ómringk dore Middellandjse Zieë, d'n Atlantischen Oceaan enne Golf van Biskaje. 't Haet 'n oppervlaakdje van 582.530 km². De wichtigste revere zeen d'n Ebro, d'n Taag, d'n Douro, de Guadiana enne Guadalquivir. 't Hoogste puntj van Iberië is de Mulhacén (3478 m). De wichtigste stej zeen de twieë houfstej van Portugal en Spaanje: Lissabon en Madrid, mitte stej Barcelona, Málaga, Porto, Sevilla en Valencia.

Geologisch gezeen besteit 't sjiereilandj oet e stök aerdkoosj det tiejes de Alpien orogenees taengen en langs Frankriek is geboetsj, wodoor 't orogeen vanne Pyrenejen is óntstange. 't Grótste deil van 't sjiereilandj besteit oete meseta, de Spaanse hoeagvlaakdje die saere Hercynische orogenees koem is verangerdj. Daonaeve guuef 't e deil bekke wie 't Ebrobekke, 't Tabernasbekken en 't bekke vanne Guadalquivir.

Lenjer

De volgendje lenjer en gebiede ligke deils of gans op 't Iberisch sjiereilandj:

Andorra, 'nen dwergstaot inne Pyreneeje;
Frankriek, e deil bergdaal inne Pyreneeje;
Spaanje;
Portugal;
Gibraltar, e Brits gebiedsdeil euvere zieë aan 't zujelik puntj van Spaanje.